Kërkohen më shumë takime e kontakte me shtetet skeptike për liberalizim vizash

Drejtori ekzekutiv i Institutit të Kosovës për Drejtësi, Ehat Miftaraj, ka thënë se Komisioni Evropian ka konstatuar që Kosova ka përmbushur të gjitha kriteret për liberalizim të vizave, mirëpo ka hezitime nga shtetet.

Miftaraj ka thënë se dy shtetet të cilat po hezitojnë që kosovarët ta kenë liberalizimin janë Holanda dhe Franca, ku për këtë të fundit ai ka thënë se institucionet e Kosovës duhet të kenë kontakte dhe takime në mënyrë që t’i bindin ta heqë veton ndaj liberalizimit të vizave.

“Komisioni Evropian ka konstatuar se Kosova ka përmbushur të gjitha kriteret për liberalizim të vizave. Fatkeqësisht janë dy shtete, ku Franca është ndër kryesoret të cilat kanë hezitime me faktin se Kosova përnjëmend ka përmbushur të gjitha kriteret për luftën kundër krimit të organizuar dhe të korrupsionit. Në këtë drejtim besoj që institucionet tona dhe Qeveria do të duhej që të kenë kontakte dhe takime me Francën, në mënyrë që t’i bindin edhe këtë shtete që në një farë mënyre ta heqë veton ndaj liberalizimit të vizave”, ka thënë ai.

Zgjedhjet që priten të mbahen këtë vit në Francë, sipas Miftarajt, janë të ndërlidhura me procesin e liberalizimit të vizave për Kosovën.

“Nëse Franca do të ndryshojë bindjen besoj që do të kalonte edhe te Holanda në mënyrë që Kosova ta marrë atë që i takon popullit të Kosovës, që të udhëtojë pa viza në Evropë. Në bazë të asaj çka është thënë në muajin shkurt, do të vijë një delegacion nga Franca në Kosovë. Në Francë së shpejti do të kemi zgjedhje. Kështu që besoj që këto dy procese do të ndërlidhen me njëra-tjetrën që Franca ta ndryshojë qasjen dhe të marrë një vendim për të lejuar liberalizimin e vizave për kosovarët”, tha Miftaraj. /EO