Komuna e Prishtinës shpërndan teste antigjen për COVID-19 nëpër shkolla

Komuna e Prishtinës shpërndan teste antigjen për COVID-19 nëpër shkolla

Aktuale January 16, 2022 - 18:17

Komuna e Prishtinës ka njoftuar se, duke pasur parasysh gjendjen aktuale të pandemisë, për fillimin e gjysmëvjetorit të dytë të shkollës, është duke bërë furnizimin me teste të shpejta antigjen përmes pështymës për Covid-19.

Në njoftim, Komuna thotë se shpërndarja e testeve ka filluar të bëhet nëpër institucione dhe gjatë pranimit të produktit ekipi i kontraktuar do t'u japë informatat e hollësishme dhe do të ofrojë trajnim rreth përdorimit të testeve antigjen.

"Deri më tani testet antigjen janë shpërndarë nëpër tetë institucione parashkollore, shkolla fillore dhe të mesme të larta, kryesisht me numër të madh të nxënësve në zonat urbane. Në ditët në vijim mbetet të përfshihen edhe zonat periferike të kryeqytetit", ka njoftuar Komuna.

Është planifikuar që testet të shërbejnë gjatë gjithë gjysmëvjetorit të dytë, ndërsa theksohet se do të testohen vetëm nxënësit që kanë këto simptoma:

-Temperaturë mbi normale
-Kollitje apo ethe
-Kontakt me persona të infektuar.

"Ndarja e testeve është bërë në proporcion me numrin e nxënësve në institucione", ka përfunduar komuna njoftimin e saj. /Zëri