Vuçiqi e bën fajtore Britaninë për aksionin e Policisë së Kosovës në veri: Nuk lejoj të më bëjnë budalla

Presidenti serb Aleksandar Vuçiq foli ashpër për Britaninë e Madhe dhe vendet e tjera perëndimore, të cilat ai i akuzoi se gjithmonë i mbështesin shqiptarët e Kosovës kundër serbëve.

Vuçiqi i tha televizionit serb "Prva" se shqiptarët nuk e kishin planifikuar aksionin e policisë së Kosovës në veri të mërkurën, kur pati konflikt me serbët në veri të Mitrovicës, transmeton N1.

“Shqiptarët bëjnë gjithmonë gjithçka me mbështetjen e Quintit, por ka nivele të ndryshme. Vetë Mbretëria e Bashkuar u përgjigj dhe tha se i mbështeste të gjitha. Ata mbështesin gjithçka që është kundër serbëve dhe Serbisë. Vetëm me lejen tuaj (britanike) shqiptarët mund të shkelin Marrëveshjen e Brukselit. Ju jeni ata që u jepni atyre këtë forcë", tha Vuçiqi, shkruan Zeri.info.

Ai deklaroi se dëshiron "marrëdhëniet më të ngushta" me Britaninë e Madhe, por se nuk do t'i lejojë "të më bëjnë budalla" me, siç thotë ai, pretendimet se aksioni i policisë së Kosovës të mërkurën kishte për qëllim luftën kundër krimit.

"Çfarë mund të më ndodhë mua? Ata mund të më heqin nga pushteti, por unë nuk besoj se ata mund ta bëjnë këtë në një mënyrë kaq të hapur. Unë përsëri do të mëtoj për miqësinë me Britaninë e Madhe, por edhe për të drejtën time për t'i thënë atyre se çfarë mendoj. Le të mos pretendojmë më, të gjithë së bashku, se kjo është një luftë kundër korrupsionit", shtoi Vuçiqi.

Presidenti serb hodhi poshtë vlerësimet në disa media se krijimi i tensioneve në Kosovë i përshtatet atij me qëllim krijimin e Asociacionit të komunave me shumicë serbe (AKS), duke deklaruar se krijimi i AKS-së ishte rënë dakord me Marrëveshjen e Brukselit.

Duke folur për zgjedhjet që do të mbahen të dielën në Kosovë, Vuçiqi deklaroi se ai beson se serbët duhet të shkojnë tek ata - por ai gjithashtu tha se do të mbështesë çdo vendim të tyre. /Zëri