Kurti: Për herë të parë, Kompleksit Memorial “Adem Jashari” do t’i bëhet një vlerësim i hollësishëm

Sot në Qeverinë e Kosovës është mbajtur Mbledhja e dytë e Komitetit Ndërministror për koordinimin e procesit, përzgjedhjen e projektit dhe monitorimin e procesit të implementimit të projektit për Kompleksin Memorial “Adem Jashari” në Prekaz, në të cilën u diskutua për raportin e vlerësimit të përpiluar nga ekipi i inxhinierëve mbi gjendjen fizike të ndërtesave në Kompleks.

Kryeministri Albin Kurti i cili ka udhëhequr këtë takim, ka thënë se një vlerësim i këtillë po bëhet për herë të parë në këtë kompleks, transmeton Zeri.info.

Gjithashtu, në kuadër të mbledhjes u propozuan anëtarët potencial për Komisionin e ekspertëve, i cili nga momenti i themelimit do t’i prijë gjithë punës profesionale në kuadër të këtij Komiteti.

“Ashtu siç kemi rënë dakord në mbledhjen e parë, dhe sepse ky është ndër proceset dhe projektet më delikate të Republikës sonë, do të punojmë me hapa të sigurt, pa u ngutur, por edhe pa humbur kohë. Nuk do të kursejmë asgjë për të ndërtuar një kompleks memorial të përmasave botërore, çfarë është edhe figura e Adem Jasharit. Një kompleks memorial që do të rrëfejë dinjitetshëm dhe me standard të arrirë artistik rezistencën e popullit dhe luftën për liri, pavarësi e bashkim”, tha Kurti.

Ministri i Kulturës, Rinisë dhe Sportit, Hajrulla Çeku, njoftoi të pranishmit për raportin vlerësues mbi gjendjen e ndërtesave në Kompleksin Memorial “Adem Jashari” në Prekaz.

“Ekipi i ekspertëve nga Fakulteti i Ndërtimtarisë kanë analizuar pesë ndërtesat e Kompleksit Memorial. Raporti përfundimtar përmban 200 faqe, dhe është i mbështetur tërësisht në metodologji, hulumtime dhe analiza profesionale-shkencore”, shpjegoi ministri Çeku.

Sipas raportit që paraqiti ministri Çeku, në tri objektet e para, është paraparë mbrojtje e ndërtesave nga shembjet progresive dhe sanimin e elementeve primare që janë dëmtuar, por që nuk janë klasifikuar për intervenim emergjent të tërësishëm. Ndërsa në dy objekte është e nevojshme të ndërhyhet urgjentisht për marrjen e masave mbrojtëse duke i klasifikuar për intervenim emergjent të tërësishëm.

Në njoftimin nga Qeveria, thuhet se me miratimin e këtij raporti, Komiteti mandatoi Ministrinë e Kulturës, Rinisë dhe Sportit për ndërmarrjen e veprimeve të nevojshme në ndërtesat e lartpërmendura. /Zëri