Kurti shprehet i vendosur se Serbia do të paditet për gjenocidin e kryer para 22 vjetësh

Kryeministri i Kosovës, Albin Kurti, tha se Serbia ende qeveriset nga persona që kanë qenë ministra e zyrtarë të lartë në kohën kur masakrat ndaj shqiptarëve janë urdhëruar e zbatuar.

Kurti nga Pokleku i Drenasit, ku po mbahet manifestimi qendror për shënimin e Ditës së Paqes tha po ashtu se Kosova duhet ta padisë Serbinë për gjenocidin e kryer para 22 vjetësh.

“Serbia ende qeveriset nga persona që kanë qenë ministra e zyrtarë të lartë në kohën kur këto masakra janë urdhëruar e zbatuar. Sigurisht, ata sot nuk mund të vijnë më të na pushtojnë e të na vrasin, por ëndrrat e tyre jo vetëm nuk i mohojnë por i proklamojnë vazhdimisht, me investimet e shfrenuara për armatim modern duke blerë armë prej Rusisë, Bjellorusisë e të tjera. Pse armatoset Serbia, ky vend që ende nuk ka kërkuar falje për krimet masive që ka bërë 22 vite më parë. Duhet ta padisim Serbinë për gjenocid. Vrasjet e civilëve, grave shtatzëna, të miturve, foshnjave, pleqve, përdhunimi i përdorur si armë luftë janë dokumentuar e po dokumentohen”, ka thënë ai sot para të pranishmëve.

22 vjet më parë, NATO hyri në Kosovë me mbi 50 mijë trupa në Kosovë si pjesë e misionit të saj të KFOR-it për të siguruar paqe dhe lirinë e lëvizjes. /Zëri