Lajçaku takohet me Vuçiqin, flasin për zhvillimet e fundit në dialog
Presidenti i Serbisë, Aleksandar Vuçiq sot pati takim me ndërmjetësuesin special të BE-së për dialogun Kosovë-Serbi, Miroslav Lajçak.
Kështu ka bërë të ditur Vuçiqi, i cili pas këtij takimi tha se dëshiron paqe dhe stabilitet në rajon, ndërsa theksoi se Serbia është e gatshme për vazhdimin e dialogut.
“Duam të ruajmë paqen dhe stabilitetin. Serbia është e gatshme të vazhdojë dialogun. Bisedë e mirë sonte me Miroslav Lajçakun”, deklaroi Vuçiqi përmes një postimi në Twitter.
Deklaratë pas këtij takimi pati edhe Lajçaku ku tha se kanë biseduar lidhur me zhvillimet e fundit në dialog dhe vizitën e tij në NATO dhe Çeki.
“Vlerësova mundësinë që të diskutoja me presidentin e Serbisë, Aleksandar Vuçiq për zhvillimet e fundit në dialog dhe marrëdhëniet BE-Ballkan Perëndimor, si dhe dy vizitat e fundit në NATO dhe Republikën Çeke sot”, deklaroi Lajçaku përmes Twitterit.
Kujtojmë se nesër në Bruksel do të zhvillohet një darkë jozyrtare, e thirrur nga kryediplomati i BE-së, Josep Borrell. Aty do të marrë pjesë edhe kryeministri i Kosovës, Albin Kurti, që shënon kështu zyrtarisht edhe takimin e parë me Vuçiqin. /Zëri