LDK-ja thotë se Qeveria s’ka plan për rimëkëmbje ekonomike
Lidhja Demokratike e Kosovës thotë se qeveria “Kurti 2” ka paraparë një program të zbrazët dhe të pabuxhetuar ekonomik.
Kështu tha anëtari i Kryesisë i Lidhjes Demokratike të Kosovës, Besian Mustafa, në një konferencë për media.
Ai shtoi se në program nuk ka shifra, por vetëm fjalë.
“Në aspektin ekonomik programi i Qeverisë së re është i zbrazët, bosh dhe i pabuxhetuar. Sa do të jetë rritja ekonomike, buxheti pas 4 viteve, sa do të rritet prodhimi vendor, si do të rritet eksporti? Kjo qeveri nuk ka plan për rimëkëmbje, nuk ka masa, nuk ka buxhet. Shumë fjalë e asnjë masë, asnjë shifër. Nuk parashihet asnjë projekt i ri, vetëm vazhdim i atyre që kanë nisur”, tha Mustafa, raporton Zeri.info.
Sipas tij, Qeveria do të rrisë borxhin e shtetit deri në 1.69 miliard euro.
“Kjo Qeveri nuk jep përgjigje se si do të implementohen një mori e programeve sociale të reja. Programet ekzistuese nuk duket që do të reformohen, por shihen qartë që këto do të paguhen duke i futur qytetarët në borxhe. Qeveria parasheh që deri në vitin 2024 ta rrisë borxhin e shtetit deri në 1.69 miliard euro”, tha ndër te tjera anëtari i Kryesisë së LDK-së, Besian Mustafa. /Zëri
