Rama në Itali: Dialogu Kosovë-Serbi është tejzgjatur, e rëndësishme përfshirja e Gjermanisë dhe Francës

Kryeministri i Shqipërisë, Edi Rama është ftuar në Firence në konferencën vjetore “State of the Union”.

Rama në këtë konferencë ka folur edhe për dialogun Kosovë-Serbi dhe dokumentet “Non paper” që po qarkullojnë kohët e fundit për korrigjim të kufijve në Ballkanin Perëndimor.

Kryeministri shqiptar tha se vendet e këtij rajoni duhet të punojnë së bashku për atë që është e mundur.

Ai thekson se dialogu mes Kosovës e Serbisë është tejzgjatur për një kohë të gjatë, por dy vendet e kanë të pamundur ta bëjnë vetë procesin.

Rama shton se përfshirja e Francës dhe Gjermanisë është shumë e rëndësishme në dialogun Kosovë-Serbi.

“Mendoj që pikësëpari mënyra më e mirë për të ecur përpara është që të biem dakord për mos rënë dakord për atë që nuk është e zgjidhshme. Të punojmë së bashku me gjithë vendet e rajonit për atë që është e mundur. Duhet të bëjmë më të mirën për të arritur këtë hapësirën ‘Shengen’, ku 4 liritë e Evropës zbatohen. Kjo po kështu do të ndihmojë që ta bëjë atmosferën dashamirëse, kur bëhet fjalë për temat e nxehta”, citohet të ketë thënë Rama, njofton “Balkanweb”.

“Besoj fort, është thelbësore ajo çka Gjermania dhe Franca do të duan të bëjnë kur bëhet fjalë për dialogun Kosovë-Serbi. Është tejzgjatur për një kohë të gjatë, dhe është parë sipas meje në mënyrë jo korrekte, kjo ka qenë ndjesia në të dyja vendet si diçka që është lënë në nivel më të ulët se sa të vihet në krye. Pra sjellja në nivelin më të lartë, përfshirja e Francës dhe Gjermanisë, apo dhe të tjerët, është e rëndësishme. Nuk shoh se si dy palët të mund ta bëjnë këtë më vete, por e di që s’është e mundur”, tha kryeministri Rama.