Caktohet Trupi Gjykues në çështjen ndaj Salih Mustafës
Të mërkurën (5 maj 2021), kryetarja e Dhomave të Specializuara të Kosovës, Ekaterina Trendafilova, ka caktuar gjykatësit Roland Dekers, Mapi Feld-Folia, Zhilber Biti, dhe Vladimir Mikula (rezervë) në Trupin Gjykues I.
Ky caktim u bë pas njoftimit prej Gjykatësit të Procedurës Paraprake se dosja e plotë e çështjes “Prokurori i Specializuar kundër Salih Mustafës (KSC-BC-2020-05)” do të jetë gati për t’i kaluar Trupit Gjykues më 7 maj 2021.
“Në pajtim me rregullën 116 dhe rregullën 117 të Rregullores së Procedurës dhe të Provave, pas marrjes së dosjes së çështjes, Trupi Gjykues mban pa vonesë një konferencë përgatitore për gjykimin me palët, pas së cilës përcakton afatin për mocionet që mund të dorëzohen prej tyre para nisjes së gjykimit. Çështja kundër z. Salih Mustafa është e para që do t’i kalohet një trupi gjykues”, thuhet në njoftimin e Dhomave të Specializuara të Kosovës në Hagë. /Zëri
