Presidentja Osmani u “gozhdua” se nuk e përmendi UÇK-në, por jo edhe Haradinaj, Hoxhaj e Kurti që vepruan ngjashëm
22-vjetori i Betejës së Koshares, dhe asaj të Kaçanikut bëri bashkë krerë institucionalë e partiakë të cilët bënë homazhe e shprehen nderimin e lavdinë duke kujtuar dëshmorët e vendit, raporton Zeri.info.
Përveç homazheve në Koshare me një postim në Facebook, presidentja e Kosovës, Vjosa Osmani tha se liria mori kuptim kur trimat e Brigadës 138, e vulosën përfundimisht lirinë e vendit, shtruan bazament të fortë për të ardhmen, shtetin dhe kujtesën historike.
Por, ndaj Osmanit kanë vërshuar dje reagime të shumta, pasi që kjo e fundit është akuzuar për mospërmendje të Ushtrisë Çlirimtare të Kosovës (UÇK) në postimin për përvjetorin e Koshares si dhe betejës së Kaçanikut.
Mirëpo, presidentja Osmani nuk është e vetmja që në deklaratën e saj për përvjetorin e Betejës së Koshares nuk përmendi UÇK-në.
Ndonëse është e vetmja që dje u "gozhdua" pse UÇK-ja si emërtim i luftës çlirimtare nuk ishte përfshirë në fjalimin e saj.
Po dje në deklarimet e tyre për përvjetorin e Betejës së Koshares, si dhe Kaçanikut, UÇK-ja nuk është përmendur as në postimin e kreut të AAK-së, Ramush Haradinaj, të parit të PDK-së Enver Hoxhaj dhe as nga Jashar Ramadani, vëllai i heroit Agim Ramadani, si dhe as në një postim të kryeministrit Albin Kurti.
Kreu i AAK-së Ramush Haradinaj pa përmendur UÇK-në ka thënë: “Njëzetedy vite më parë, u shemb me luftë kufiri mes Kosovës e Shqipërisë, i vendosur padrejtësisht për dekada me radhë. Në rrugën tonë drejt lirisë, kemi pasur shumë vuajtje e sakrifica, por kemi dëshmuar edhe trimëri, guxim e vendosmëri. Ëndrra e shumë brezave u realizua në Luftën Çlirimtare, fal atyre që pa hezitim ia falën jetën Atdheut. Përulemi para gjakut të Heronjve të Brigadës 138 “Agim Ramadani”.
Edhe kryetari i PDK-së, Enver Hoxhaj nuk përmendi Ushtrinë Çlirimtare të Kosovës në shkrimin e tij në Facebook për 28 dëshmorët e 32 martirët në Kaçanik.
“22 vite më parë, në Kaçanik, duke i dhënë goditjen e fundit armikut, në “Lagjen e Re” dhe në Rakoc ranë heroikisht 28 dëshmorë të kombit dhe 32 martirë. Sot, me nder dhe krenari kujtojmë të gjithë ato gra e ata burra nga qyteti ynë i rezistencës e historisë, që refuzuan të nënshtrohen para një pushtuesi kriminal, duke mos kursyer as jetën e tyre për çlirimin e vendit. Lavdi të përjetshme dëshmorëve dhe martirëve tanë”, ka shkruar Hoxhaj.
Po ashtu edhe Jashar Ramadani vëllai i dëshmorit Agim Ramadani dje ka shkruar për 22 vjetorin e Epopesë së Kosharës, por i njëjti po ashtu nuk e përmendi UÇK-në.
“Sot shënojmë 22 vjetorin e Epopesë së Koshares, të heqjes me luftë të kufirit shqiptaro – shqiptar që kishte ndarë kombin Shqiptar më se një shekull. Madhështia e Epopejës së Koshares përmban fshirjen e lëshimeve historike që janë bërë në kohëra të ndryshme. Luftëtarët e Koshares të udhëhequr nga Komandantët profesionist të artit të luftës që ishin të brumosur me intelektualizëm, patriotizëm e atdhedashuri, ishin të pathyeshëm të gjithë si një, në arritjen e këtij qëllimi dhe prishjen e integritetit territorial të së ashtuquajturës Jugosllavi të mbetur. Jeni histori e ndritur”, ka thënë Jashari.
Edhe kryeministri i Kosovës, Albin Kurti sot është kritikuar për mospërmendjen e UÇK-së në shkrimin e tij në Twittër për 22 vjetorin e Epopesë së Kosharës.
Before we had April 9 as #ConstitutionDay we had April 9 as #KoshareDay.
— Albin Kurti (@albinkurti) April 9, 2021
In the Battle of Koshare, brave men and women gave everything so that we could live free.
Let us never forget where we come from, for then we we will always know the right path forward. pic.twitter.com/bl6q4mFXao
Ndaj shkrimit të Kurtit ka reaguar sot aktivisti shqiptar në Shtetet e Bashkuara të Amerikës e ish-ushtari i Batalionit Atlantiku, Uk Lushi, duke iu drejtuar kryeministrit të vendit, Albin Kurti.
Lushi ka thënë se burrat dhe gratë e UÇK-së nuk janë të paemër, sipas tij ata kishin një emër, teksa i thotë Kurtit se nuk duhet hezituar për ta përmendur Ushtrinë Çlirimtare të Kosovës.
“z. Kryeministër Albin Kurti, “burrat dhe gratë e guximshme” s’janë të paemër, e kishin një emër: UÇK. Mos hezito që ta thuash, ta shkruash dhe ta nderosh EMRIN TONË MË KRENAR. Ne nuk ishim burra e gra të paemër. Ne ishim Ushtria Çlirimtare e Kosovës, UÇK”, ka shkruar Lushi në kundërpërgjigjen e tij për kryeministrin Kurti./Zëri
