Lajçak: Albin Kurti e di mirë se çfarë pritet prej tij

Lajçak: Albin Kurti e di mirë se çfarë pritet prej tij

Aktuale March 01, 2021 - 11:25

Përfaqësuesi special i BE-së, Miroslav Lajçak, ka thënë se Albin Kurti e di shumë mirë se çfarë pritet prej tij.

Një gjë të tillë ai e ka dhënë gjatë një interviste për mediat serbe, kur është pyetur “në lidhje me angazhimin dhe konstruktivitetin e qeverisë së re në Prishtinë, e cila pritet të përfaqësohet nga fituesi i zgjedhjeve, Albin Kurti”.

“Ai u zgjodh për t’i zgjidhur disa çështje të brendshme të Kosovës, të tilla si korrupsioni, drejtësia dhe çështjet sociale dhe ai e di shumë mirë se bashkësia ndërkombëtare, BE-ja dhe Shtetet e Bashkuara presin që dialogu të vazhdojë dhe ai është i gatshëm për këtë”, citohet të ketë thënë Lajçaku, përcjell “Telegrafi”.

Lajçaku, duke folur për vizitën e tij në Kosovë dhe Serbi, ka thënë se nuk vjen në Beograd me një “ultimatum” dhe se Serbia nuk duhet të ketë frikë nga bashkëpunimi i ripërtërirë midis BE-së dhe SHBA-së, se ai është i bindur se ka një hapësirë ku Beogradi dhe Prishtina mund të bien dakord për marrëdhëniet e ndërsjella, raporton “Tanjug”-u.

“BE-ja nuk punon në parimin e ultimatumeve. Ne jemi këtu për t’ju ndihmuar. Qëllimi i dialogut është të mbështesë të dy, Beogradin dhe Prishtinën, dhe të sjellë të ardhmen evropiane më afër të gjithë rajonit”, thotë Lajçaku.

Në një bisedë të zhvilluar në gjuhën serbe Lajçaku gjithashtu theksoi se gjatë vizitës së tij në Prishtinë dhe Beograd do të dëshironte të dëgjonte përgjigjen në pyetjen se kur do të vazhdojë dialogu në Bruksel.

Ndërsa kur është pyetur se si e sheh bashkëpunimin e ardhshëm me administratën e re në Washington në lidhje me dialogun midis Beogradit dhe Prishtinës, Lajçaku tha se nuk ishte një “partneritet i ri”, por një kthim në “bashkëpunimin e vjetër”, i cili beson se ka shumë kohë dhe është traditë e suksesshme në Ballkanin Perëndimor.

“Ne jemi në kontakte të ngushta me partnerët amerikanë, e njohim mirë njëri-tjetrin dhe ndajmë të njëjtin qëllim, kjo është e ardhmja evropiane e Ballkanit Perëndimor. Unë nuk mendoj se dikush duhet të ketë frikë nga bashkëpunimi BE-SHBA në dialogun midis Beogradit dhe Prishtinës. Normalizimi i marrëdhënieve midis Beogradit dhe Prishtinës është një parakusht për integrimin e suksesshëm, Shtetet e Bashkuara dhe BE-ja janë këtu për të ndihmuar”, ka thënë në fund Lajçaku.