Shqipëria me rekord historik – vdekjet tejkalojnë lindjet

Shqipëria me rekord historik – vdekjet tejkalojnë lindjet

Aktuale January 25, 2021 - 09:46

Gjatë vitit 2020 në vend u regjistruan rreth 27.600 lindje. Ky është niveli më i ulët i shtesës natyrore të popullsisë, jo vetëm në këto 30 vjet, por së paku që nga viti 1948.

Sipas të dhënave nga Drejtoria e Gjendjes Civile, në vitin që lamë pas humbën jetën 28.026 persona, ose rreth 6 mijë më shumë se viti i mëparshëm, duke shënuar një nivel rekord historik të lartë.

Një prej arsyeve të rritjes se vdekshmërisë raportohet të jetë virusi COVID-19.

Shqipëria bëhet në këtë mënyrë vendi i dytë në rajon, pas Serbisë, me shtesë natyrore negative.


Një ndër faktorët që ndikon në rënien e popullsisë është dhe niveli i lartë i emigracionit në dekadat e fundit, me rreth 40% të popullsisë që jeton jashtë.

Prirja e emigrimit është përshpejtuar sërish vitet e fundit, duke përfshirë dhe largimin e familjeve.

Një studim mbi emigracionin që zhvilloi INSTAT-i, në bashkëpunim me donatorët në rreth 20 mijë persona, i kryer në prill-korrik 2019, ka zbuluar një fakt të frikshëm në dekadën e kaluar, pasi fenomeni është zgjeruar me emigrimin e së gjithë familjes.

Gjatë dhjetëvjeçarit të fundit janë larguar nga vendi 6,6% e familjeve, gjithsej 49,500 të tilla, ndërsa në vitet 2001-2011 ishin larguar 4,4% e njësive familjare. /EURONEWS