Votohet Projektligji për rimëkëmbje ekonomike, qytetarët mund të tërheqin 10 për qind nga Trusti

Votohet Projektligji për rimëkëmbje ekonomike, qytetarët mund të tërheqin 10 për qind nga Trusti

Aktuale December 04, 2020 - 14:17

Deputetët e Kuvendit të Kosovës sapo kanë votuar Projektligjin për rimëkëmbjen ekonomike.

Deputetë që kanë votuar pro Projektligjit për rimëkëmbje ekonomike janë 72, asnjë kundër dhe asnjë abstenim.

Projektligji u votua nga deputetët e LDK-së, të PDK-së dhe të Nisma – AKR - 6+.

Në seancën e jashtëzakonshme në rend dite pati vetëm një pikë:

“Shqyrtimi i dytë i Projektligjit nr. 07/L-016 për rimëkëmbjen ekonomike – COVID-19”, deputetët i dhanë vizë tërheqjes së 10 për qind nga Trusti, raporton “Zeri.info”.

Ata që nuk dhanë votën për këtë projektligj janë deputetët e LVV-së, të cilët në fillim të seancës u deklaruan kundër votimit të këtij projektligji me arsyetimin se nuk është pro interesave të qytetarëve, por në favor të grupeve të interesit.

Projektligji për rimëkëmbje ekonomike u votua nga deputetët e PDK-së vetëm pasi u përfshinë edhe katër amendamentet e propozuara nga kjo parti.

Amendamentet e PDK-së janë: Pakoja për qytetarët, punëtorët dhe bizneset e prekura nga pandemia të jetë mbi 400 milionë euro, pagesa për punëtorët që kanë humbur vendet e punës të jetë 300 euro për muaj, heqja e TVSH-së për lëndën e parë për ta mbështetur sektorin e prodhimit, si dhe të bëhet rimbursimi nga shteti i mjeteve prej 10% nga Trusti për qytetarët që i kanë deri 10 mijë euro kursime.

Ky projektligj u miratua në lexim të parë më 12 tetor, pas gjashtë dështimeve, me 64 vota pro.

Ndërkohë që në seancë është votuar Rezoluta për gjendjen e personave me aftësi të kufizuara në Kosovë, me 94 vota gjithsej pro. /Zëri