Të enjten hapen objektet fetare dhe do të ndryshojë orari i lëvizjes
Foto: Laura Hasani

Të enjten hapen objektet fetare dhe do të ndryshojë orari i lëvizjes

Aktuale May 25, 2020 - 18:04

Ministri i Shëndetësisë Arben Vitia, bashkë me kreun e Bashkësisë Islame të Kosovës, Myftiun Naim Tërnava, kreun e Ipeshkvisë së Kosovës, Imzot Dodë Gjergji, drejtorin e IKSHPK-së, Naser Ramadani dhe drejtoreshën e Klinikës Infektive të QKUK-së, Lindita Ajazaj Berisha, kanë mbajtur konferencë për media, raporton Zeri.info.

Në këtë konferencë Vitia ka njoftuar se nga dita e enjte do të hapen objektet fetare dhe orari i lëvizjeve të qytetarëve do të jetë nga ora 5 e mëngjesit deri në orën 21:00.

“Zero raste ishin mbrëmë, kjo nuk ka ndodhur që nga data 13 mars, kjo ka ndodhë falë bashkëpunimit me qytetarët tanë. Janë realizuar mbi 13 mijë teste dhe rreziku ende nuk ka kaluar. Masat në fillim ishin më të vështira ndërsa nga 4 maji ka filluar lehtësimi i masave. Pas diskutimit në javën e kaluar jemi të gatshëm për lehtësimin e masave më tej. Ndër masat lehtësuese janë edhe ato të objekteve fetare të cilat do të hapen më 28 maj. Edhe orari për lëvizje do të ndryshojë, do të jetë nga ora 5 e mëngjesit deri në ora 21:00. Do të mbyllet karantina. Në fazën e tretë shihen masat tjera vlerësuese në të cilat do të çlirohet ekonomia”, ka deklaruar ministri Vitia, raporton Zeri.info.

Tutje ka shtuar se maskat, mbajtja e distancës dhe higjiena duhet të vazhdojnë të mbahen.

“Përdorni maskat në markete, zyrë, floktari, te mjeku, në autobus, vendosni maskat çdo herë, çdo kund, mbani distancën si në shtëpi, në rrugë dhe kudo, shmangni vizitat te familjarët, virusi kalon nga një shtëpi tek tjetra kur bëni vizita familjare. Le t'i ruajmë ata që i duam më së shumti”, ka thënë Vitia.

“Do të doja t'i heqim masat dhe të kthehemi në realitet. Shkollat dhe çerdhet do të hapen, por distanca dhe mjetet duhet të mbahen. Kufijtë do të hapen, por masat mbrojtëse duhet të përdoren”, ka thënë Vitia.

Ai tha se vala e dytë e virusit nuk dihet se a do të vijë.

Ndërkaq, drejtori i ISHKPK-së, Naser Ramadani, ka thënë se muaji prill ka qenë mesi i epidemisë, duke shtuar tutje se kufizimet kanë shpëtuar jetë.

“Situata epidemiologjike sot më duket më e qëndrueshme se ditëve më parë. Duke pasur parasysh se ju keni pyetur gjatë gjithë kohës për valën e dytë, ne kemi kaluar një etapë të lakores ku mesi i epidemisë ka qenë në muajin prill. Ka qenë e frikshme të mendojmë se ku kemi mundur të jemi nëse s'ju kishim përmbajtur masave që janë kërkuar nga IKSHPK. Kufizimet kanë shpëtuar jetë", ka thënë ai.

Drejtoresha e Klinikës Infektive të QKUK-së, Lindita Ajazaj Berisha, ka thënë se QKUK do të vazhdojë të qëndrojë në gatishmëri të qytetarëve.

Kurse kreu i Bashkësisë Islame të Kosovës, Myftiu Naim Tërnava, ka thënë se qytetarët së bashku kanë arritur në dobësimin e virusit.

“Ia arritëm që ta do dobësojmë këtë virus që të hapen dyert e Zotit, të hapen xhamitë e kishat”, përfundoi ai.

Imzot Dodë Gjergji tha se gjatë gjithë kësaj kohe është lutur për popullin shqiptar.

“Qytetarët kanë qenë të dëgjueshëm dhe tanimë mund të kthehen në kisha e xhamia. Virusi është ende mes nesh, duhet të heqim maskat përball botës, por sot duhet të mbajmë maskat për t’u mbrojtur nga virusi”, tha ai.