Sot takohet Këshilli i Kryetarëve të Komunave të Republikës së Kosovës

Këshilli i Kryetarëve të Komunave të Republikës së Kosovës të premten do të mbajë një takim në Shtëpinë e Kulturës në Drenas.

Takimi mbahet me qëllim që diskutimit të situatës sa i përket ndalimit të përhapjes së koronavirusit (COVID-19).

Po ashtu në këtë takim do të diskutohet për nevojat që kanë komunat e Kosovës, me theks të veçantë edhe për bashkëpunimin që u duhet me nivelin qendror.

Ministria e Shëndetësisë, si Ministria përgjegjëse për menaxhimin e situatës së krijuar nga COVID-19, ka vendosur orar të ri të lëvizjes për komunën e Malishevës, për komunën veriore të Mitrovicës dhe për komunën e Zveçanit.

Në njoftim thuhet se sipas situatës epidemiologjike dhe rekomandimeve të Ministrisë së Shëndetësisë, në koordinim paraprak me komunat, për të frenuar përhapjen më tej të COVID-19, nga 10 prill 2020, në komunat tashmë në karantinë, do të ketë orar të ri të lëvizjes brenda këtyre komunave.

Komuna e Malishevës 14:00 - 06:00 (ndalimi i qarkullimit)

Komuna Veriore e Mitrovicës 12:00 - 06:00 (ndalimi i qarkullimit)

Komuna e Zveçanit 12:00 - 06:00 (ndalimi i qarkullimit).

Kurse nëpër komunat e tjera, nga data 13 prill, kur do të hyjë në fuqi vendimi i marrë nga Gjykata Kushtetuese, masat për kufizim të lëvizjes nuk do të vlejnë.

Megjithatë, institucionet përgjegjëse shëndetësore po bëjnë vazhdimisht thirrje që të gjithë qytetarët të qëndrojnë brenda shtëpive, duke theksuar se prilli është muaji më kritik për ne.