Kurti i fton organet e drejtësisë ta hetojnë marrëveshjen mes Thaçit dhe Rasmussenit
Foto: Laura Hasani

Kurti i fton organet e drejtësisë ta hetojnë marrëveshjen mes Thaçit dhe Rasmussenit

Aktuale February 26, 2020 - 14:25

Kryeministri i Kosovës, Albin Kurti, në një konferencë për medie ka theksuar se dje pasdite i ka dërguar letër kryetares së Kuvendit, presidentit të shtetit dhe kryeprokurorit ku ka shfaqur një marrëveshje siç e quan ai, sekrete të nënshkruar mes Thaçit dhe ish-sekretarit të NATO-s, raporton Zëri.info.

“Dje pasdite unë i kam dërguar letër kryetares së Kuvendit, presidentit dhe kryeprokurorit që ka të bëjë me një marrëveshje sekrete të nënshkruar nga presidenti i Kosovës më 13 prill 2013. Atë ditë nuk kishim një marrëveshje në Bruksel por dy një mes Thaçit dhe Daçiqit dhe një tjetër që ishte zotim i njëanshëm i presidentit Thaçi”, ka thënë Kurti.

Tutje ai ka theksuar se në këto letra presidenti Thaçi ka bërë shkelje ligjore me të cilat duhet të merret drejtësia.

“Ky shkëmbim këtyre letrave mes sekretarit Rasmussen dhe ish kryeministrit Thaçi paraqet marrëveshje ndërkombëtare. Fshehja e një marrëveshje të tillë më 13 prill të 2013-s konsiderojmë që është shkelje flagrante me të cilën do të duhej të merren organet e drejtësisë”, ka thënë Kurti.

Ai theksoi se është shumë e rëndësishme të merret vesh se kush e ka kërkuar një zotim të tillë nga Thaçi. Ai theksoi se nuk beson që një gjë të tillë ta ketë kërkuar Brukseli por mund ta ketë kërkuar Serbia./Zëri