Pse Molliqaj e fshiu statusin në të cilin kritikonte Kurtin për homazhet tek varri i Rugovës
Dardan Molliqaj, Kryetar i PSD-së, e publikoi nja status në llogarinë e tij në facebook në të cilin e kritikonte Kurtin për homazhet te varri i Rugovës në 12 vjetorin e pavarësisë së Kosovës.
Molliqaj thotë se edhe pas këtij gjesti nuk kemi pse të çuditemi me asgjë, shkruan gazeta inFokus.
Sipas tij pas këtij gjesti premtimet e Kurtit për Republikë të re apo të tretë nuk ekzistojnë më.
Ai madje e quan Kurtin edhe komplotist.
Mirëpo kryetari i PSD-së si duket i bie pishman dhe e fshiu postimin e tij pak kohë pas publikimit.
Ky është postimi i plotë të cilin e fshiu Dardan Molliqaj:
Më i riu në rrugën e konformizmit
Vizita e Albin Kurtit më 17 Shkurt tek varri i Rugovës nuk është e zakonshme. Mbase nuk ka gjë të keqe në vetvete thjesht nderimi i tij. Por, nuk e bëri këtë në përvjetorin e tij të vdekjes. Kështu mund të ishte një nderim i rëndomtë. Ai po i përkulet me 17 Shkurt. Është Ibrahim Rugova si projekt politik.
Janë tashmë shumë indikacione që çojnë në të njejtin drejtim: në intervistën e tij në Rubikon ai po lutej që mos të vlerësohej karshi temave që ishin kauza për 15 vjet, por për antikorrupsionin; kurse në marrëveshjen për bashkëqeverisje me LDK – në nuk ka bash asgjë që mund të quhet transformuese.
Vizita e tij tek Rugova e ka përtërirë dhe vulosur traditën. Shumë figura të rezistencës e kanë bërë para tij. Kështu, varri i Rugovës është bërë monumenti i ”rrugës së re”. Pas këtij gjesti s’kemi pse çuditemi me asgjë. Nuk ka më Republikë të tretë, as Republikë të re.
Pas intervistave të fundit, një shok me tha: ”Albini vetëm tash është bërë politikan”. Nga pikëpamja e sotme unë vlerësoj që gjatë aktivitetit tonë kemi pasur model fatal organizimi. Prirjet komplotiste vinin nga po ky model. Por një gjë e vlerësoj si virtyt që duhet ruajtur me çdo kusht. Kemi punuar gjatë me praktikë e teori për ta luftuar përkufizimin e politikës që ma tha ky shoku im. Për politikën pa përpjekje për të vërtetën; për politikën që mashtrimin e ka parim normal operues; për politikën ”realiste”, atë politikë ku shpjegimi i rrethanave bëhet strehë për oportunizmin; atë politikë që na thotë se njeriu s’është gjë tjetër veç mish dhe asht . Atë politikë që na thotë se nuk ia vlen të jetohet për një Ide të madhe.
