Konjufca pranon telegram urimi nga kryetari i Kuvendit të Maqedonisë së Veriut, Talat Xhaferi

Xhaferi përmes kësaj letre i ka uruar Konjufcës, postin e kryetarit të Kuvendit të Kosovës, dukë shprehur gatishmërinë që edhe gjatë këtij mandati do të vazhdojnë bashkëpunimin në mënyrë të hapur dhe miqësore.

“Veçanërisht do e kisha theksuar bashkëpunimin ndërmjet kuvendeve si më të drejtpërdrejtë dhe të afërt. Më lejoni t’i përsëris zotimet e Kuvendit të Republikës së Maqedonisë së Veriut për thellimin e bashkëpunimit me Kuvendin e Republikës së Kosovës në të gjitha nivelet dhe fushat me interes të përbashkët”, thuhet ndër të tjera në këtë letër.

Më poshtë gjeni të plotë letrën:

“I nderuar z. Konjufca,

Më lejoni që në emrin tim personal dhe në emër të Kuvendit të Republikës së Maqedonisë së Veriut t’ju drejtoj urime të sinqerta për zgjedhjen e Juaj për kryetar të Kuvendit të Republikës së Kosovës, me dëshirë për kryerje të suksesshme të kësaj detyre me përgjegjësi.

Republika e Maqedonisë së Veriut dhe Republika e Kosovës kultivojnë marrëdhënie bilaterale të mrekullueshme që karakterizohen me afërsi, përzemërsi dhe miqësi, si edhe me mbështetje të ndërsjellë pa rezervë dhe unë siqerisht besoj se edhe gjatë mandatit Tuaj do të vazhdojmë të bashkëpunojmë në mënyrën e njëjtë të hapur dhe miqësore.

Veçanërisht do e kisha theksuar bashkëpunimin ndërmjet kuvendeve si më të drejtpërdrejtë dhe të afërt.

Më lejoni t’i përsëris zotimet e Kuvendit të Republikës së Maqedonisë së Veriut për thellimin e bashkëpunimit me Kuvendin e Republikës së Kosovës në të gjitha nivelet dhe fushat me interes të përbashkët.

Koleg i nderuar, pranoni edhe njëherë shprehjet e respektimit tim të thellë“, thuhet në telegramin e urimit të kryeparlamentarit Xhaferi.