Pezullohet greva për objektin e Ministrisë së Kulturës

Këshilli Organizativ i Protestës në Ministrinë e Kulturës Rinisë dhe Sportit, ka vendosur që ta pezullojë përkohësisht grevën, e cila ishte shpallur në fund të muajit nëntor të vitit të kaluar.

Me anë të kësaj greve, ishte kundërshtuar vendimi i qeverisë që në objektin e Ministrisë së Kulturës, të vendoset Presidenca.

Drejtues të  Sindikatës së Punëtorëve thanë për  Radio Kosovën se greva do të pezullohet deri në një vendim të ri nga ana e  Ministrisë së Administratës Publike .

Punëtoret e Ministrisë së Kulturës Rinisë dhe Sportit, përkohësisht do ta ndërpresin grevën. Kjo u bë e ditur pas një takimi të mbajtur nga Këshilli Organizativ i Protestës.

Kryetari i Sindikatës se Punëtorëve në Ministrinë e Kulturës,  Labinot Berisha, tha për Radio Kosovën së ky vendim do të jetë në fuqi deri në një vendim të ri që pritet të jetë i paanshëm nga ana e Ministrisë së Administratës Publike .

“ Këshilli Organizativ i Protestës ka marrë vendim që greva e përgjithshme, e shpallur në të gjitha hapësirat ku funksionon Ministria e Kulturës, Rinisë dhe Sportit, të pezullohet.  Ky vendim është marrë për arsye se Ministria e Administratës  Publike publikisht është deklaruar se nuk do të marrë veprime të një anshme për largimin e punëtorëve nga objekti”, ka thënë Berisha.

Berisha, tha se punëtorët e Ministrisë së Kulturës do të pranojnë të lirojnë objektin vetëm në rast se do të kenë ofertë që vendosja e tyre të bëhet në një objekt publik.