Ekspertiza zvicerane për rastin Dehari ka 50 faqe, përkthimi do të vonojë

Ekspertiza zvicerane për rastin Dehari ka 50 faqe, përkthimi do të vonojë

Aktuale tetor 23, 2019 - 12:36
Detajet

Javën që shkoi u tha se rezultatet e ekspertizës  zvicerane për rastin e Astrit Dehari do të përkthehen për 3 ditë. Por, duket se familja dhe opinioni duhet të presin më gjatë për ta kuptuar përfundimin e zviceranëve që besohet se do ta vulosë mënyrën e vdekjes së aktivistit të Vetëvendsosjes. Sipas Kryeprokurorit të Prokurorisë Themelore në Prizren Admir Shala rezultatet e ekspertizës kanë mbi 50 faqe material. Shala i ka thënë Gazetës Express se pret që këtë javë do të përfundojë përkthimi i ekspertizës voluminoze,. 

Kanë kaluar gjashtë ditë prej konferencës për media, kur kryeprokurori i Prokurorisë Themelore në Prizren, Admir Shala njoftoi se ka arritur në Kosovë, përmes ambasadës së Zvicrës raporti për ekspertizën e rastit të Astrit Deharit.

Deri më tani, pavarësisht kërkesave të palës mbrojtëse e familjes Dehari ekspertiza nuk iu është dhënë atyre. Prokuroria në Prizren të premten e javës që shkoi, prindërve e gruas së Deharit iu tha se rezultati i ekspertizës është dërguar për t’u përkthyer, e për këtë do të duhen 3 ditë. Kjo pavarësisht se familja Dehari kanë kërkuar që raporti t’u dorëzohet në gjuhën me të cilën Instituti në Llozanë të Zvicrës e ka dërguar në Kosovë.

Gazeta Express ka kontaktuar të mërkurën kryeprokurorin e Prokurorisë Themelore në Prizren për të pyetur se kur do të përfundohet përkthimi i raportit.

Kryeprokurori Admir Shala ka se janë duke pritur se kur do t’i njoftojnë se përkthimi është kryer. Ai  ka pohuar se arsyeja e vonesës është pasi që bëhet fjalë për material që ka mbi 50 faqe.

“Po presim edhe ne kur na njoftojnë. Besojmë që brenda javës përfundohet. Janë mbi 50 faqe material”, ka thënë kryeprokurori.

Për vonesën e dorëzimit të raportit kanë reaguar edhe familja Dehari dhe avokati mbrojtës Tomë Gashi. Avokati është ankuar se nuk po e dinë pse duhet një javë për të përkthyer një raport tre faqe.

“Nuk e kuptoj këtë vonesë për përkthim të një raporti tre faqe”, ka thënë ai.

Aktivisti i Vetëvendosjes Astrit Dehari vdiq më 5 nëntor të vitit 2016 në Qendrën e Paraburgimit në Prizren. Raporti i Institutit të Mjekësisë Ligjore rreth shkaqeve të vdekjes së Astrit Deharit më 18 nëntor 2016 nxorri se Dehari ka bërë vetëvrasje, por rezultatet e këtij raporti nuk u pranuan nga prindërit e të ndjerit.

Në tetorin e vitit të kaluar Qeveria e Kosovës pas kërkesës së familjes  ka ndarë mjetet financiare në shumën prej 50 mijë eurove për ekspertizë shtesë jashtë vendit në lidhje me vdekjen e Astrit Deharit.