Arsim Bajrami refuzon të jetë pjesë e strukturave udhëheqëse të PDK-së
Ish-nënkryetari i PDK-së, Arsim Bajrami, ka bërë të ditur se ka hequr dorë nga çfarëdo propozimi apo nominimi për t’u zgjedhur në strukturat e kësaj partie.
Ai në llogarinë e tij në Facebook ka shkruar se duhet ta ketë një fillim dhe fund të arsyeshëm dhe të dinjitetshëm, për t’u ofruar hapësirë gjeneratave të reja.
Ai ka theksuar se do të vazhdojë të mbetët anëtar i thjeshtë dhe votues i PDK-së.
“Sot po zhvillohet Konventa e IX Zgjedhore e Partisë Demokratike të Kosovës dhe siç e kam njoftuar para disa ditësh, me një letër informuese, Kryetarin Kadri Veseli, dëshiroj që edhe përmes këtij rrjeti social, të njoftoj me falënderim dhe mirënjohje anëtarët, simpatizantët, votuesit dhe strukturat e Partisë Demokratike të Kosovës, për vendimin tim për të heq dorë nga çfarëdo propozimi apo nominimi për t’u zgjedhur në strukturat partiake”.
“E vlerësoj lartë me mirënjohje, mbështetjen dhe besimin e anëtarëve, simpatizantëve e votuesve të devotshëm dhe strukturave e lidershipit të Partisë Demokratike të Kosovës, për mbështetjen dhe besimin e pa-rezervë, për gati 20 vite, që si njëri ndër themeluesit e Partisë, më kanë besuar dhe zgjedhur në funksionet më të larta partiake, politike e institucionale”.
“Konsideroj që tani pas, gati dy dekada, është e rrugës të ofrojë edhe një kontribut modest me shembullin personal, që angazhimi aktiv partiak e politik, duhet ta ketë një fillim dhe fund të arsyeshëm dhe të dinjitetshëm, duke ofruar hapësirën e nevojshme për gjeneratat më të reja, ndërsa do të vazhdojë të mbetëm një anëtar i thjesht dhe votues i PDK-së, dhe të ofrohem gjithnjë, më të gjitha kapacitetet, si zë i arsyes dhe këshillës e kritikës dashamirëse, të cilat jam përpjekur e angazhuar t’i promovoj, tash e gati dy dekada me radhë, në kuadër të Partisë Demokratike të Kosovës”.
“Duke qenë krenar për bashkëpunimin që kemi pasur, uroj që Partia Demokratike e Kosovës, të zhvilloj një proces zgjedhor kredibil, legjitim dhe në frymën demokratike. Ju faleminderit për përkrahjen tuaj”.
