Ky është i intervistuari i radhës nga Specialja, po ashtu ish-komandant i UÇK-së
Për dy ditë me radhë në zyrat e EULEX-it në Prishtinë është intervistuar ish- komandanti i UCK-së, nga zona e Pashtrikut, Naser Krasniqi.
Ky i fundit e ka angazhuar për avokat Florin Vertopin, por që nuk ka qenë i qasshëm për media për të folur lidhur me raportimin e T7.
Ndryshe Naser Krasniqi ka qenë i akuzuar për krime lufte edhe në rastin Kleçka ku është shpallur i pafajshëm.
Deri tani ftesa nga Prokurorët e Dhomave të Specializuara kanë marrë ish komandantët e zonave operative, Rrustem Mustafa e Sami Lushtaku, por edhe disa ish pjesëtarë tjerë të UÇK-së, si Sokol Dobruna e Nazif Mehmeti, etj.
Tashmë Mustafa e Lushtaku e kanë përfunduar intervistimin në Hagë dhe ata pritet që të kthehen në Kosovë këto ditë.
Dhomat e Veçanta apo Gjykata Speciale për krime lufte në Kosovë do të hetojë krimet e pretenduara të pjesëtarëve të ish-UÇK-së.
Këto pretendime për krime i ngriti në raportin e tij për Këshillin Evropian senatori Dick Marty, e i cili thotë “krimet janë kryer ndaj pjesëtarëve të komuniteteve pakicë dhe kundërshtarëve politikë nga viti 1998 e deri në fund të vitit 2000”.
Kështu pas shumë përpjekjeve edhe u formua Gjykata Speciale. Kjo gjykatë është formuar pasi Kuvendi i Kosovës miratoi legjislacionin e nevojshëm dhe u bë plotësisht funksionale në korrik të vitit 2017. Gjykata financohet nga Bashkimi Evropian dhe drejtohet nga stafi ndërkombëtar.
