Bëhet i 'gjallë' Thaçi: Jam në pushime dimërore

Presidenti i Kosovës, Hashim Thaçi ka deklaruar se nuk ekziston asnjë marrëveshje e nënshkruar me Serbinë, siç përflitet në deklaratat e disa politikanëve në Kosovë. Përmes një përgjigje me shkrim, Thaçi tha se aktualisht ndodhet në pushime dimërore, dhe se do ta takojë Ekipin negociator qysh të hënën.

“Unë në vazhdimësi i kam informuar të dy bashkëkryesuesit e Ekipit Negociator për të gjitha temat që janë diskutuar deri më tani në Bruksel, në kuadër të fazës së fundit të dialogut për normalizimin e marrëdhënieve ndërmjet Kosovës dhe Serbisë”, tha Thaçi për Radio Evropa e Lirë .

LEXO EDHE: “Ekzili” i fshehtë i Hashim Thaçit

“Gjithashtu, ua kam bërë të qartë se deri më tani nuk ekziston asnjë dokument i shkruar zyrtar apo draft-marrëveshje e përgatitur nga BE-ja. Kjo është e natyrshme, sepse ne jemi në fazën fillestare të negociatave për të arritur një marrëveshje përfundimtare gjithëpërfshirëse. Përkundër kësaj, sapo ta mbaroj pushimin, të hënën do të takojë Ekipin Negociator dhe do ua japë edhe në formë të shkruar informacionet e përgjithshme për periudhën e deritashme të bisedimeve. Në këtë proces historik, ne do të punojmë së bashku dhe në koordinim me njëri-tjetrin”, ka thënë presidenti Thaçi.

Ekipi negociator, i përbërë nga përfaqësuesit e Qeverisë dhe njërës nga partitë opozitare, ka kërkuar ditëve të fundit që t’i ketë në dispozicion të gjitha dokumentet zyrtare që ndërlidhen me procesin negociator të Kosovës dhe Serbisë në Bruksel.

Për vendodhjen e presidentit Thaçi ka raportuar sot edhe gazeta "Zëri. Gazeta “Zëri” jozyrtarisht ka mësuar se kreu i shtetit aktualisht gjendet në Bruksel, ndonëse për një gjë të tillë nuk është lëshuar kurrfarë njoftimi zyrtar. Të kontaktuar nga gazeta “Zëri”, askush nga Presidenca nuk ka dashur të flasë rreth kësaj çështjeje.