Shqiptarët, të parët në rajon për pushime

Aktuale May 01, 2018 - 17:17
Lexo detajet

1 Maji në Shqipëri prej vitesh e ka humbur simbolikën, duke u kthyer në një ditë pushimi, kryesisht për punonjësit e administratës shtetërore, ndërsa në sektorin privat jo të gjithë pushojnë. Mbrojtja ligjore për punët jashtë orarit dhe ditëve të pushimit në Shqipëri është tejet e ulët.

Sipas INSTAT, që i referohet vitit 2017, në Shqipëri punohet mesatarisht 2,173 orë në vit, ose rreth 42 orë pune në javë. Ndërsa mesatarja e vendeve të zhvilluara të OECD-së është 1764 orë. Në krahasim me mesataren, të punësuarit me pagë në Shqipëri punojnë rreth 409 orë më shumë, përcjell albinfo.ch.

Vendet me numrin e orëve mesatare më të ulët se mesatarja e OECD-së janë ato të Evropës Perëndimore, si Holanda me 1435 orë pune në vit, Franca me 1472 orë në vit, Zvicra me 1589 orë.

Por, pavarësisht orarit të zgjatura, ditët zyrtare të pushimit në Shqipëri ka më shumë se sa vendet e rajonit. Nga festat e Vitit të Ri deri te Dita e Flamurit dhe lejet vjetore shqiptarët kanë 34 ditë pushimi të paguara.

Në Malin e Zi, sipas të dhënave janë 8 ditë pushimi zyrtar. E në Kosovë, duke iu referuar të dhënave zyrtare, ka rreth 9 ditë pushimi, përveç të shtunave dhe të dielave dhe ditëve kur pushimet i bien gjatë fundjavës. Në Serbi, Maqedoni dhe Bosnjë janë rreth 11 ditë zyrtare pushimi.