Januzaj zbulon arsyen pse nuk arriti të ketë sukses te Unitedi
Adnan Januzaj mendon se gjërat do të kishin shkuar më ndryshe te Manchester Unitedi nëse atij do t’i ishte dhënë rasti nga trajneri Jose Mourinho. Futbollisti shqiptar thotë se i ka aftësitë e duhura për të luajtur te “Djajtë e Kuq”, mirëpo gjithashtu shprehet se është i lumtur te Real Sociedadi, shkruan sot, gazeta "Zëri"
Adnan Januzaj beson se atij nuk i është dhënë mundësia për të treguar kualitetet e tij te Manchester Unitedi nga trajneri Jose Mourinho. Mesfushori shqiptar beson se është i mirë mjaftueshëm për të luajtur te “Djajtë e Kuq”, porse Mourinho nuk ia dha shansin që i nevojitej.
23-vjeçari kishte bërë debutimin me gjigandin anglez në Superkupën Anglezë në vitin 2013 dhe ishte lavdëruar mjaft shumë gjatë asaj kohe, saqë ishte konsideruar si pasuesi i Ryan Giggsit. Ai kishte bërë paraqitje mjaft të mira në muajt e parë nën drejtimin e David Moyesit. Por, sidoqoftë ai nuk arriti dot t’i realizojë pritjet dhe eventualisht u largua në drejtim te Real Sociedadi në verën e vitit të kaluar kur Mourinho e shihte si tepricë në ekipin e tij.
Januzaj ndien se atij nuk i janë dhënë minutat e mjaftueshme si lojtar i ri në mënyrë që t’i tregojë kualitetet e tij nën drejtimin e portugezit, i cili e dërgoi lojtarin në huazim te Sunderlandi pas ardhjes së tij në vitin 2016 para se ta largonte përfundimisht vitin tjetër.
“Unë nuk e pata rastin sepse në atë kohë ai (Mourinho) me siguri donte lojtarë me emër, më me përvojë”, është shprehur Januzaj për “Sky Sports”.
Ai insiston se i ka kualitetet e duhura për të shkëlqyer në “Old Trafford”, por thotë se është i lumtur në Sociedad, klub me të cilin është paraqitur plot 39 herë në të gjitha garat që prej transferimit në vitin e kaluar.
“Për mua nuk ishte problem. Unë duhej të vazhdoja përpara dhe tani jam i lumtur në Spanjë dhe jam duke bërë diferencën. Unë gjithmonë e dija që kisha kualitetet për të luajtur për Manchester Unitedin. Unë e di se çfarë jam në gjendje të bëj. Ata nuk më dhanë asnjë rast mua, por nuk është problem. Unë jam i lumtur në Spanjë dhe jam duke e shijuar futbollin”, ka thënë reprezentuesi belg.
Ish-klubi i tij momentalisht zë pozitën e tetë në Premierligë, 12 pikë prapa rivalit lokal, Manchester City që mban kreun e tabelës pas 12 xhirove, por Januzaj i mbështet “Djajtë e Kuq” në rikthimin e tyre te triumfet.
“Ata (Manchester Unitedi) janë duke vuajtur. Është një ekip i madh dhe me tifozë të mëdhenj, por momentalisht ata janë duke vuajtur. Natyrisht, ata do të kthehen në maje. Unë mendoj se atyre u nevojitet vendimi i duhur për të fituar ndeshje. Ka shumë arsye (pse ata janë duke vuajtur), kështu që ata duhet të marrin vendimet e duhura”, u shpreh Januzaj./Zëri