Fjalët e para të Valon Berishës si lojtar i Lazios: Çfarë dite, ëndrra u bë realitet!

Sport July 03, 2018 - 20:21
Lexo detajet

Valon Berisha tashmë edhe zyrtarisht është pjesë e klubit italian, Lazio.

Mesfushori 25-vjeçar i Kombëtares së Kosovës kaloi me sukses të gjitha testet mjekësore dhe firmosi për 4 sezone me bardhekaltrit.

Në fjalët e para si futbollist i Lazios, ai shprehu lumturinë e këtij transferimi, ndërsa nuk harroi të falënderojë edhe klubin austriak të Salzburgut, ku edhe shkëlqeu.

“Jam ndier shumë mirë te Salzburgu, ku kam fituar shumë trofe dhe kam njohur shumë njerëz fantastikë. Momenti më i bukur ishte kualifikimi në gjysmëfinale të Europa League. Kishte ardhur momenti për të hedhur një tjetër hap, ndaj firmosa për Lazion, sepse është pjesë e një prej kampionateve më të mira në Evropë”, tha Valoni.

“Salzburgu, gjithsesi, do të mbetet pjesë e rëndësishme e karrierës sime”.

“Jam shumë i lumtur që kam firmosur për Lazion. Çfarë dite për mua dhe familjen time!. Kush do ta kishte besuar se një fëmijë nga një qytet i Norvegjisë (Egersund) do të mbërrinte në një qytet të madh të Italisë (Romë). Ëndrrat u bënë realitet. Po pres me padurim të takoj shokët e mi të rinj. Tani nis një punë e vështirë. Forca Lazio!”, deklaroi mes tjerash Valon Berisha.

Valoni ishte pjesë e Salzburgut që nga viti 2012 ku ka bërë 233 paraqitje, duke shënuar edhe 45 gola. /Insporti.com/