Sport

Karateistët mbeten pa medalje në Lojërat Mesdhetare

Karateistët mbeten pa medalje në Lojërat Mesdhetare
24 qershor 2018 • 17 : 16

Karateistët kosovarë janë eliminuar herët në Lojërat Mesdhetare edhe pse nga ta pritej që ta fitonin së paku një medalje, shkruan Zeri.info.

Karateisti më i mirë kosovar, Herolind Nishevci u mposht nga egjiptiani, Ahmad Asfar, në kategorinë +84 kilogramë. Kampi i karateistit kosovar kishte vërejtje në vendimet e gjyqtarëve.

Pa medalje ka mbetur edhe njëri prej karateistëve më të mirë të vendit, Alvin Karaqi. Ai e nisi me fitore këtë eksperiencë pasi e mposhti kroatin Ivan Kvesic me rezultat 4:3 në kategorinë deri 84 kilogramë, edhe pse ishte duke humbur 1:3.

Mirëpo, ai u mund në meçin e dytë nga egjiptiani Ahmed Elmasry. Kurse, Orges Arifi (-60 kg) u mposht në rrethin e parë të karatesë nga maqedonasi, Emil Pavlov, 1:3.

Për dallim nga meshkujt, karateistet femra ishin më afër medaljes. Fortesa Q. Orana (+68 kg), pësoi humbje në repasazh nga kroatja, Ana Marija Celan, në Lojërat Mesdhetare "Tarragona 2018".

Ajo kishte humbur edhe në rundin e parë të garave nga grekja Eleni Chatziliadou.

Ndërkaq, karateistes Adelina Rama (-61 kg) nuk i priu fati, pasi humbi të shtunën 1:0 në luftën për medaljen e bronztë.

Ajo u mposht nga spanjollja, Maria Ferrer.

Adelina e kaloi rrethin e parë pa luftë, kurse në atë të dytë pësoi humbje nga egjiptiania Giana Lotfy. Në luftën për repasazh ajo e mposhti portugezen Ana Simaoi. /Zëri/

© zëri.info