Tifozët Kuq e Zi i dënojnë komentet e Grillos, i kërkojnë RTSH-së t’i hiqet mundësia e komentimit
Pas deklaratave të komentatorit, Konstandin Grillo se e përkrah kombëtaren e Serbisë në Botërorin e Rusisë, si dhe ekipin e Zvezdës, ka reaguar edhe tifogrupi i kombëtares shqiptare, Tifozat Kuq e Zi (TKZ).
Përmes një postimi në Facebook “Kuqezinjtë” kërkojnë heqjen e të drejtës së Grillos për të komentuar në televizionin publik shqiptar, ndërsa kanë dënuar ashpër deklaratat e tij.
TKZ-ja thekson se këto janë deklarata anti-kombëtare, si dhe promovim i interesave të këtij shteti.
Kërkesën e TKZ-së mund ta lexoni më poshtë:
(Kërkesë dërguar RTSH - Radio Televizionit Shqiptar)
Të nderuar anëtarë të Këshillit drejtues të RTSH,
I nderuar Z.Pano Xhixho,
Mbrëmjen e së enjtes kemi ndjekur me shqetësim deklaratat e komentatorit sportiv Kostandin Grillo në një nga emisionet sportive me anë të të cilave ai mbështet publikisht kombëtaren e Serbisë dhe ekipin e Zvesdës së Beogradit.
Duke dënuar këto deklarata, sa kontradiktore aq edhe antikombëtare, njëkohësisht edhe aktivitetin e tij të hapur pro- serb dhe grek në rrjetet sociale, ku vazhdimisht shihet promovimi i interesave të këtyre dy shteteve, kërkojmë nga ju që në të ardhmen, komentatorit Kostandin Grillo t’i hiqet mundësia e komentimit të ndeshjeve së Kombëtares Kuq e Zi dhe jo vetëm.
Kjo kërkesë bëhet duke marrë parasysh faktin që ai paguhet nga taksapaguesit shqiptarë për të komentuar ndeshjet sportive në një televizion publik.
Ne presim nga ai dhe të tjerë komentatorë që të jenë shembull i transmetimit të vlerave tona.
Por nuk mundemi kurrsesi ta pranojmë faktin që një komentator sportiv i cili mbështetet financiarisht tek sportdashësit shqiptarë, të jetë në përkrahje të antivlerave duke promovuar vazhdimisht lojtarët serb në ekipet tona lokale, duke mbështetur publikisht kombëtaren serbe apo interesat greke kundrejt shteteve të tjera.
I shohim të tilla provokime si joprofesionale dhe kundër interesit të sportdashësit shqiptar.
Së fundmi, i rikujtojmë komentatorit Grillo që Serbia, përveçse nuk është e vetmja kombëtare nga Ballkani që po merr pjesë në Kampionatin Botëror është gjithashtu kombëtarja e atij vendi për të cilin ai, në një tjetër emision, ka deklaruar që i ka sjellë frikën më të madhe në jetën tij (ndeshja në Beograd në 14.10.2014)!
Duke shpresuar në pranimin e kësaj kërkese, urojmë që komentatorëve apo opinionistëve të tjerë të tillë t’u kufizohet sa më shumë hapësira mediatike në emisionet tuaja.
Me respekt,
Tifozat Kuq e Zi
