Java e befasive
Sigal Prishtina e ka fituar më lehtë se kurrë më parë derbin e dikurshëm ndaj Trepçës, të cilën e mposhti në Mitrovicë me plot 66 pikë dallim, 108:42.
Prishtinasit e kryen krejt punën qysh në çerekun e parë, të cilin e fituan 30:9. Ata ishin bindës edhe në periudhën e dytë, të cilën e fituan 27:11.
E në 10-minutëshin e tretë mitrovicasit ishin dizastër i vërtetë: realizuan vetëm 1 pikë, krahas 32 të pësuarave.
Ndërkaq çereku i katërt u takoi “Xehetarëve”, 21:19, por deri në atë periudhë kishte marrë fund gjithçka.
Martin dhe Veseli shënuan nga 18 pikë për kampionin, kurse Berisha shtoi 14. E te mitrovicasit 18 pikë realizoi Haxhiu e Malaj 15.
Mitrovicasit nuk janë të vetmit që u “goditën” në fundjavë. Në fakt të dielën Peja e pësoi njërën prej humbjeve më të rënda në histori.
Verdhezinjtë u mposhtën në shtëpi nga Rahoveci, 87:96. Pejanët e fituan çerekun e parë, 29:23, por edhe atë të dytë, 25:24.
Por duket se kjo ishte fuqia e tyre pasi rahovecasit reaguan për mrekulli në pjesën e dytë.
Ata e fituan 10-minutëshin e tretë, 20:10 dhe në atë të fundit dhe vendimtar ishin më të mirë, 29:23, për ta fituar ndeshjen e radhës dhe për ta rrëmbyer pozitën e dytë në tabelë, të cilën e ndan me Golden Eagle Yllin, që e fitoi derbin e fqinjëve ndaj Bashkimit, 92:80 (24:15, 9:25, 35:21 e 24:19).
Në duelin e fundit për nga rëndësia Borea e shijoi fitoren e parë në Superligë, duke e mposhtur Kerasan Prishtinën, 80:77 (14:22, 24:15, 24:25 e 18:15). /Zëri/
Superliga – Java e katërt
Rezultatet
Trepça – Sigal Prishtina 42:108
Peja – Rahoveci 87:96
Golden Eagle Ylli – Bashkimi 92:80
Kerasan Prishtina – Borea 77:80
Tabela
1. Sigal Prishtina 4 8
2. Golden Eagle Ylli 4 7
3. Rahoveci 4 7
4. Bashkimi 4 6
5. Peja 4 6
6. Borea 4 5
7. Kerasan Prishtina 4 5
8. Trepça 4 4
