Tensione në Formula 1, Vettel e aksidenton qëllimisht Hamiltonin (VIDEO)

Skena mund të kishte ndodhur në secilën nga rrugët e Tiranës, por në fakt ndodhi në Çmimin e Madh të Azerbajxhanit të Formulës 1, në sytë e miliona teleshikuesve dhe protagonistë ishin dy kampionë bote.

Kur ishte larguar makina e sigurisë, Lewis Hamilton, i cili kryesonte garën, frenoi fort duke bërë që Sebastian Vettel të përplaste turirin e makinës në pjesën e pasme të Mercedesit. Vettel humbi kontrollin, i doli në krah Mercedesit dhe e goditi. Kjo i kushtoi gjermanit një dënim “Stop & Go” 10-sekondësh.

Sebastian Vettel përfundoi në vend të katërt garën, ndërsa Hamilton doli i pesti. Me këtë rezultat, gjermani i Ferrarit arrin që të ruajë kryesimin e klasifikimit të përgjithshëm. / Top Channel/