Përmirësohet gjendja shëndetësore e Nexhmije Pagarushës
Gjendja shëndetësore e këngëtares së mirënjohur Nexhmije Pagarusha po përmirësohet gradualisht pas një aksidenti që pati të martën në banesën e saj dhe ajo po merr trajtimin mjekësor në QKUK, shkruan zeri.info.
Pas këtij aksidenti që pati Pagarusha ministri i Kulturës, Rinisë dhe Sportit, Kujtim Gashi e ka vizituar të mërkurën në spital. Ministri Gashi u informua për së afërmi për gjendjen shëndetësore të këngëtares së madhe Pagarusha dhe u shpreh i lumtur që gjendja e saj është e mirë dhe që fatmirësisht nuk ka pësuar ndonjë lëndim më të rëndë pas aksidentit.
“E vizitova krenarinë kombëtare, bilbilin e këngës shqipe, Nexhmije Pagarusha, dhe u interesova personalisht për gjendjen e saj shëndetësore dhe ndjehem jashtëzakonisht i lumtur e i gëzuar që ajo është në gjendje të mirë dhe nuk ka pësuar ndonjë lëndim serioz. I dëshiroj shërim sa më të shpejtë këngëtares dhe në anën tjetër dua të falënderoj tërë ata që janë përkujdesur për shëndetin e saj, që nga stafi mjekësor edhe studentet që kanë ndërhyrë për ta ndihmuar këngëtaren tonë të madhe”, u shpreh ndër të tjera ministri Gashi.
Ministri i ka ofruar këngëtares Pagarusha mbështetjen e plotë të MKRS-së për çfarëdo që është e nevojshme për këngëtaren. Zëri
