Kultura

Shënohet Dita Ndërkombëtare e Monumenteve dhe Lokaliteteve

Shënohet Dita Ndërkombëtare e Monumenteve dhe Lokaliteteve
18 prill 2018 • 15 : 09

Ministria e Kulturës, Rinisë dhe Sportit, ka shënuar sot Ditën Ndërkombëtare të Monumenteve dhe Lokaliteteve, shkruan zeri.info.

Ministri i Kulturës, Rinisë dhe Sportit, Kujtim Gashi, tha se Dita Ndërkombëtare e Monumenteve dhe Lokaliteteve po shënohet në kuadër të vitit të trashëgimisë kulturore evropiane, duke inkurajuar me shumë angazhim në mbrojtjen, ruajtjen dhe promovimin e trashëgimisë kulturore si vlerë e përbashkët.

Për të shënuar këtë ditë, në Parkun Arkeologjik, u promovuan tri botimet e Institutit Arkeologjik të Kosovës: Harta Arkeologjike e Kosovës Vëllimi i III-të, Trashëgimia Arkeologjike e Komunës së Istogut dhe Trashëgimia Arkeologjike e Komunës së Skenderajt.

“Jemi së bashku për të promovuar tri botimet e Institutit Arkeologjik të Kosovës dhe paraprakisht angazhimin e arkeologëve, profesionistëve, komunave që kanë bashkëpunuar me institucionet tona gjatë procesit të evidentimit të lokaliteteve, ekspeditave të ndryshme me karakter të përnjohjes por dhe atë shkencor. Puna e Institutit Arkeologjik të Kosovës, në bashkëpunim me arkeolog tjerë të vendit dhe ndërkombëtarë, me mbështetjen e Ministrisë së Kulturës, Rinisë dhe Sportit ka mundësuar në vazhdimësi dokumentimin e të kaluarës sonë, thesarit të trashëgimisë dhe qytetërimit të hershëm” tha ministri Gashi.

Ai po ashtu tha se përkushtimi për të mbështetur punën shkencore të Institutit Arkeologjik dhe institucioneve e profesionistëve do të vazhdoj.

“Rëndësi më e madhe do t’i kushtohet angazhimit të kuadrove të reja në fushën e arkeologjisë kurse fokus të përbashkët do të kemi botimet dhe prezantimet e rezultateve brenda dhe jashtë vendit”, u shpreh ministri Gashi.

Në shënim të kësaj dite, Ministria e Kulturës, Rinisë dhe Sportit ndau tri mirënjohje për përfaqësuesit e familjeve të cilat kanë dhënë kontribut në fushën e trashëgimisë arkeologjike duke i dhuruar gjetjet arkeologjike.

Mirënjohjet u ndanë për familjen e z. Faik Islami fshati Gllamnik-Komuna e Podujevës, familjen e z. Hamdi Ibishi, fshati Orllan- Komuna e Podujevës dhe për familjen e z. Prend, Nikoll e Pjeter Heqimi, fshati Zllakuqan-Komuna e Klines.

Në përmbyllje të fjalës së tij, ministri i Kulturës, Rinisë dhe Sportit, Kujtim Gashi, falënderoi për kontributin e jashtëzakonshëm të gjithë arkeologët, redaksinë e Hartës Arkeologjike , autorët, si dhe autorin e dy botimeve z. Haxhi Mehmetaj dhe komunat komuna përkatëse. Zëri 

© zëri.info