Gjysmë shekulli jetë e institucionit kryesor të trashëgimisë në Prizren

Qendra Rajonale e Trashëgimisë Kulturore në Prizren (ish-Instituti për Mbrojtje të Monumenteve) ka shënuar të mërkurën gjysmë shekulli jetë, që nga themelimi i këtij institucioni të trashëgimisë, shkruan sot, gazeta Zeri.

Në një ceremoni të organizuar në Hamamin e Gazi Mehmet Pashës, në Prizren, në këtë përvjetor jubilar u promovuan edhe katër botime të QRTK-së.

Aty para dashamirëve të kulturës u prezantuan librat “Zejet dhe Artizanatet e Prizrenit në Kompleksin Monumental të Lidhjes Shqiptare të Prizrenit” e autores Shpresë Siqeca, “Gurët Mbivarrorë në Kompleksin e Teqesë Sinani në Prizren” të Media Fishekqiut dhe dy katalogë: “Katalog me Eksponate nga Rajoni i Prizrenit” dhe “Katalog Araste Vice-Versa”.

Ministri i Kulturës, Rinisë dhe Sportit, Kujtim Gashi, i cili mori pjesë në këtë ngjarje, me këtë rast u shpreh se është një kënaqësi e dyfishtë që po merr pjesë në shënimin e 50-vjetorit të themelimit të Qendrës Rajonale për Trashëgimi Kulturore, në Prizren, apo siç është emërtuar në fillet e themelimit tij si Instituti për Mbrojtjen e Monumenteve në Prizren.

“E para për faktin se po e shënoni 50 vjetorin e themelimit të këtij institucioni të veçantë, ku për plotë pesë dekada jeni angazhuar në ruajtjen, mbrojtjen dhe promovimin e trashëgimisë tonë të çmuar kulturore. E dyta, se nga ky ambient rikonfirmoj faktin se qyteti Prizrenit përveç se është bërë qendër universitare, nga viti ardhshëm do jetë edhe qendra apo selia e Ministrisë së Kulturës Rinisë dhe Sportit”, tha ministri Gashi.

Ministri foli për rëndësinë dhe kontributin që ka dhënë QRTK-ja në Prizren, e cila ka bërë të mundur që vlerat e shumta e të pakontestueshme të kulturës materiale të krijuara pa ndërprerë, në këtë areal gjeografik të ruhen e të promovohen.

“Pasuria arkeologjike e rajonit të Prizrenit, asetet e shumta të trashëgimisë kulturore, dhe asaj shpirtërore, janë një thesar i çmuar, për të cilin ashtu siç mundi t’i ruajë toka me shekuj, duhet të mbetet obligim i yni që institucionalisht të përkujdesemi për to”, u shpreh ministri, duke e shprehur edhe mirënjohjen për stafin e vyeshëm dhe profesional të QRTK-së, por edhe për të gjithë ata, që për dekada, me përkushtim dhanë kontribut të madh në këtë fushë.

Kreu  i MKRS-sw, Kujtim Gashi, në Prizren ndau edhe një mirënjohje “Post Mortem”. Duke nderuar Muhamed Shukriun, tashmë të ndjerë, Gashi i dorëzoi familjes së tij një mirënjohje. Ministri e cilësoi Shukriun si një njeri i cili tërë jetën ia kushtoi trashëgimisë kulturore.

“Njërin ndër personalitetet të cilin nuk mund të mos e përkujtojmë sot, është i ndjeri Muhamed Shukriu, i cili tërë jetën ia kushtoi trashëgimisë kulturore. Andaj në përputhje me mandatin tim si Ministër me kënaqësi do i ndaj mirënjohjen për ‘Post Mortem’ për kontributin e dhënë në fushën e trashëgimisë kulturore këtij personalitetit të çmuar të vendit tonë”, theksoi për fund ministri Kujtim Gashi, duke i ndarë këtë çmim familjarëve të Shukriut.

Ministri  Gashi u zotua se do të punojë për një përkrahje edhe më të madhe, për t’u mundësuar institucioneve të trashëgimisë kulturore ta avancojnë këtë fushë.

Kurse Jusuf Xhibo, u.d. drejtori i QRTK-Prizren, foli për historikun e QRTK-së, që nga themelimi, në vitin 1967 e deri në sot, për sukseset dhe proceset nëpër të cilat ka kaluar ky institucion.