E dhimbshme, 12 vjeçarja nga Istogu vdes në klasë
Një vdekje e papritur ka ndodhur sot në Istog ku një vajzë e shkollës fillore ‘Bajram Curri’, ka ndërruar jetë në bankën e klasës. Rastin e ka konfirmuar për Express zëdhënësi i policisë rajonale në Pejë, Driton Rugova.
Ra pa shenja jetë në klasë. Profesori si dhe nxënësit e tjerë tentuan që t’ia japin ndihmën 12-vjecares, M.B, por pavarësisht ndihmës ajo ndërroi jetë. Vdekjen e saj e konstatuan ekipi i mjekëve të Spitalit Rajonal të Pejës, aty ku edhe u dërgua vajza me autoambulancë.
Zëdhënësi i policisë në Pejë, deklaroi për Express se rasti po cilësohet si hetim i vdekjes.
“Mund t’ua konfirmojë se një i mitur gjatë ditës së sotme është gjetur pa shenja jetë. Hetime janë duke vazhduar. Ndërkohë rasti është cilësuar si ‘Hetim i vdekjes’. Shkaqet ende nuk dihen”, ka konfirmuar Rugova për Express.
Tutje ai ka deklaruar se trupi i pajetë i viktimës i është kthyer familjes për ceremoninë mortore.
Nuk dihen ende shkaqet e vdekjes së vajzës së re. Express do të ju mbajë të informuar për këtë çështje.
