Agron Mustafa, Rexhë Gjonbalaj e Ejup Qerimi deklarohen në gjykatë

Kronika September 27, 2018 - 11:26
Lexoni më shumë detaje

Në Gjykatën Themelore në Prishtinë sot u mbajt shqyrtimi fillestar në rastin ndaj krerëve të Telekomit të Kosovës, Agron Mustafës, Ejup Qerimit si dhe Rexhë Gjonbalajt, të cilët nga Prokuroria Speciale po akuzohen për keqpërdorim të detyrës zyrtare në lidhje me marrëveshjen në mes të Z-Mobile dhe Vala.

Me këtë rast tre të akuzuarit u deklaruan të pafajshëm ndaj akuzës e cila u vihet në barrë, megjithëse i akuzuari Agron Mustafa kur u ngrit të deklarohej rreth fajësisë tha se nuk i ka të qarta disa elemente të akuzës.

Edhe mbrojtësi i tij avokati Artan Çerkini tha se as ai nuk e ka shumë të qartë akuzën e cila i vihet në barrë të mbrojturit të tij.

“Ne gjatë leximit kemi has në paqartësi dhe nuk mundemi me e bë mbrojtjen pa e pas të qartë akuzën.

“Mendoj që një deklarim për akuzën duhet të bëhet në momentin që i akuzuari e kupton akuzën”, deklaroi avokati Çerkini, por pas udhëzimeve nga kryetari i trupit gjykues, gjyqtari Lutfi Shala, avokati dhe i mbrojturi i tij u pajtuan se kundërshtimet e tyre rreth fajësisë do të i bëjnë në fazën e kundërshtimeve.

“Nuk e pranoj fajësinë për veprën për të cilën akuzohem”, tha më pas Mustafa.

Seanca e radhës do të mbahet me datën 7 nëntor.

Sipas aktakuzës, i pandehuri Ejup Qerimit gjatë periudhës kohore shkurt 2012 tetor 2014, duke shfrytëzuar detyrën, respektivisht autoritetin zyrtar nuk i ka përmbushur detyrat e tij zyrtare, me qëllim që t’i shkaktojë dëme materiale dikujt tjetër. Me këto veprime i pandehuri ka kryer veprën penale, “keqpërdorimi i pozitës apo autoritetit zyrtar” nga neni 422 paragrafi 1, të KPRK-së.

Ndërkaq, i pandehuri Agron Mustafa nga data 19.02.2015, kur ka marrë pozitën udhëheqëse e deri në momentin kur më datë 24.05.2017, kur ky i pandehur edhe pse nuk ka qenë kompetent kishte  lidhur marrëveshjen për ekzekutimin e vendimit final, i pandehuri Agron Mustafa duke shfrytëzuar detyrën, respektivisht autoritetin zyrtar nuk ka përmbushur detyrat e tija zyrtare, me qëllim që të i shkaktoj dëme materiale një kompanie tjetër. Me këto veprime i pandehuri ka kryer veprën penale, “keqpërdorimi i pozitës apo autoritetit zyrtar” nga neni 422 paragrafi 1, të KPRK-së.

Po ashtu, në aktakuzën e Prokurorisë Speciale të Republikës së Kosovës, theksohet se i pandehuri i tretë Rexhë Gjonbalaj duke shfrytëzuar detyrën e tij zyrtare nuk ka përmbushur detyrën e tij zyrtare me qëllim që të i shkaktoj dëme materiale dikujt tjetër. Me këto veprime i pandehuri Rexhë Gjonbalaj ka kryer veprën penale, “keqpërdorimi i pozitës apo autoritetit zyrtar” nga neni 422 paragrafi 1, të KPRK-së.

KALLXO.com mëson se aktakuza ka të bëjë me veprimet që i paraprinë vendimit të gjykatës dhe pastaj kontestit në arbitrazh, e të cilat u përmbyllën me marrëveshjen në mes të Z-mobile dhe Valës.

Agron Mustafa dhe Ejup Qerimi, në kohë të ndryshme, kanë mbajtur pozitën e kryeshefit të Telekomit. Ndërsa, Rexhë Gjonbalaj ka qenë kryetar i bordit të Telekomit të Kosovës.

KALLXO.com, në dhjetor të vitit të kaluar ka raportuar për fillimin e hetimeve për këtë rast. Në atë kohë, prokurori Abdurrahim Islami kishte konfirmuar për KALLXO.com se kishte nxjerrë aktvendim për nisjen e hetimeve në lidhje me dyshimet për keqpërdorim të detyrës zyrtare në lidhje me këtë rast.

Më 24 maj të vitit 2017, Telekomi i Kosovës dhe Dardafon (Z-Mobile) arritën marrëveshje për përmbylljen e vendimit të arbitrazhit rreth kontratës për operator virtual të telefonisë mobile.

Image

 

Vendimi u paraqit si një triumf për kompaninë pasi e lironte telekomin nga obligimi i pagesës prej 30 milionë eurove për kompaninë Z Mobile.

Në vitin 2016 gjykata e arbitrazhit kishte vendosur në favor të kompanisë Z Mobile në kontestin me Telekomin. Vendimi krijonte obligime për të kompensuar një dëm prej 30 milionë euro.

Menjëherë pas vendimit, pushtetarët dhe njerëzit e drejtësisë kishin reaguar duke kërkuar hetime dhe përgjegjësi për këtë humbje.

Gjakrat ishin qetësuar disa muaj më vonë kur Telekomi dhe Z Mobile u dakorduan që vendimi për pagesën e 30 milionë eurove të mos zbatohej.