Azem Syla në liri, Specialja lë rastin pa prokuror
Prokuroria Speciale e Kosovës për më shumë se një javë nuk ka arritur të caktoj një prokuror të ri i cili do merret me rastin Toka njërin prej rasteve më të mëdha në vend.
Gjykata e Prishtinës ka liruar Azem Sylën nga arresti shtëpiak, me arsyetimin se “prokuroria nuk kishte bërë kërkesë për vazhdimin e arrestit”. Prokurori rasti “Toka” ndaj Azem Sylës dhe të tjerëve, Abdurrahim Islami kishte dalë në pension vetëm pak ditë para se gjykata të lironte Azem Sylën. Gjykata e Prishtinës ishte arsyetuar se masa e arrestit nuk mund të trajtohej pa një kërkesë nga ana e prokurorisë.
Kallxo.com zbulon se rasti për më shumë se një javë nuk ka një prokuror i cili do merrej me trajtimin e tij.
Prokurori i Prokurorisë Speciale, Sylë Hoxha, njeherit përgjegjës për komunikim me media në këtë prokurori, tha për kallxo.com se ende nuk është caktuar prokurori i ri i këtij rasti.
“Ende nuk e kemi caktuar prokurorin e ri të këtij rasti, por shumë shpejt do të caktohet”, tha Hoxha.
Megjithatë, prokurori Hoxha tha se Prokuroria Speciale ende nuk ka pranuar vendimin e gjykatës për lirimin e Azem Sylës nga arresti shtëpiak. Sipas tij, prokuroria do të parashtroj ankesë ndaj lirimit nga arresti shtëpiak.
“Nuk e kemi pranuar ende vendimin e gjykatës për lirimin nga arresti të Azem Sylës, por kur ta pranojmë ne do të ankohemi për këtë vendim”, tha Hoxha.
