Së shpejti vendimi i Kushtetueses për rritjen e pagave nga Haradinaj
Vendimi që e kishte marrë kryeministri Ramush Haradinaj kohë më parë për rritjen e pagave të kabinetit qeveritar, u pezullua për një kohë nga ministri i Finanacave, Bedri Hamza. Kjo pasi Agjencia Kundër Korrupsion në një vendim kishte bërë të ditur se në këtë vendim ka pasur shkelje ligjore.
Pas vendimit të AKK-së vendimi i Haradinajt për rritjen e pagave ishte dërguar edhe në Gjykatën Kushtetuese.
Këtë e kishte bërë deputetja e Vetëvendosjes, Albulena Haxhiu duke u arsyetuar se një vendim i tillë ishte ndërhyrje në kompetencat e Kuvendit.
Tashmë vendimi i Haradinajt për rritjen e pagave është duke u shqyrtuar nga Gjykata Kushtetuese.
Të paktën kështu ka konfirmuar kjo gjykatë në një përgjigje me shkrim për lajmi.net
“Kjo lëndë tashmë është duke u shqyrtuar nga Gjykata, sapo të merret vendimi për këtë do të njoftohen të gjitha palët e përfshira në rast dhe i njëjti do të publikohet edhe në ueb-faqen e Gjykatës”, thuhet në përgjigjen e Gjykatës Kushtetuese.
Edhe pse ishte planifikuar që qysh nga muaji shkurt anëtarët e kabinetit qeverisës t’i marrin rrogat me rritje, një gjë e tillë nuk ka ndodhur.
Kjo pasi ministria e Finacave nuk e ka zbatuar vendimin, duke u arsyetuar se po pret shqyrtimin e plotë ligjor të kësaj çështje.
Haradinaj kishte marrë vendim për rritjen e pagave të anëtarëve të kabinetit qeverisës në dhjetor të vitit të kaluar.
Rrogën e tij Haradinaj e kishte bër 2 mijë e 950 euro, kurse rritje kishte edhe për zv/kryeministrat, ministrat, këshilltarët dhe anëtarët e tjerë të Qeverisë. /Lajmi.net
