Aktivisti i 'Vetëvendosjes' dënohet me 6 muaj burgim për djegien e një veture zyrtare në Pejë
Besnik Zeqiraj, aktivist i Lëvizjes Vetëvendosje është dënuar me 6 muaj burgim nga Gjykata Themelore në Pejë.
Kjo pasi ai akuzohej se në dhjetorin e vitit 2015 i kishte vënë zjarrin një veture të Gjykatës ëpr Kundërvajtje.
Lajmin e ka konfirmuar edhe "Vetëvendosje", përmes një njoftimi për media, duke e cilësuar si vendim të padrejtë.
Njoftimi i plotë i "Vetëvendosjes:
DËNOHET ME 6 MUAJ BURG AKTIVISTI BESNIK ZEQIRAJ, PA ASNJË PROVË
Gjykata Themelore në Pejë ka dënuar sot aktivistin e Lëvizjes VETËVENDOSJE! nga Peja, Besnik Zeqirajn, me 6 muaj burg.
Ai akuzohej se në dhjetorin e vitit 2015 i kishte vënë zjarrin një makine të Gjykatës për Kundërvajtje, së bashku me një person tjetër, për çfarë me herët ka mbajtur 3 muaj burg si dhe 1 muaj masën e arrestit shtëpiak.
Dënimi i aktivistit Zeqiraj është i pabazuar, rrjedhimisht i padrejtë e i papranueshëm. Ai do të vuaj edhe 2 muaj burg për një vepër të cilën nuk e ka kryer asnjëherë, dhe e cila i ngarkohet pa asnjë provë dokumentuese .
Drejtësia e kapur dhe në shërbim të klanit Pronto vazhdon përndjekjen e aktivistëve të pafajshëm të Lëvizjes VETËVENDOSJE!, gjersa qëndron e heshtur karshi sulmeve kriminale me motive politike nga segmente të pushtetit ndaj aktivistëve tanë.
Ky pushtet që po shkon sigurt drejt theqafjes, është i tmerruar jo vetëm nga rënia e tij, por më shumë nga rritja e përkrahjes për VETËVENDOSJE!-n dhe shteti i së drejtës që synohet nga ne, me vendosjen e të cilit kriminelët do ta humbin lirinë.
Veprimet e tilla siç është dënimi i padrejtë ndaj Besnik Zeqirajt, do të mbahen mend si padrejtësitë e fundit të këtij regjimi kriminal.
