Gjykata sërish vendos ta lirojë Naser Kelmendin

Disa ditë pasi ishte rikthyer në qendrën e paraburgimit në Dubravë, Gjykata Themelore e Prishtinës ka liruar përsëri nga paraburgimi Naser Kelmendin, të akuzuarin për vrasje dhe krim të organizuar.

Lajmin për KALLXO.com e konfirmoi avokati i tij, Besnik Berisha. Ndërsa, vendimin e ka miratuar gjyqtarja Ana Admaska Gallant.

I akuzuar për vrasje, krim të organizuar, shitje e prodhim të drogës, si dhe për menaxhim dhe mbikëqyrje të rrjetit të narkotikëve, Naser Kelmendi, është në paraburgim që nga koha e arrestimit të tij, në maj të vitit 2013.

Kur iu lexua aktakuza më 16 janar 2015, Kelmendi u deklarua i pafajshëm, ndërsa e cilësoi aktakuzën një prodhim nga Bosnja.