Bankat, në rrezik nga sulmet kibernetike
Një delegacion i kryesuar nga zëvendësministri i MPB-së, Nehat Mustafa, në cilësinë e Koordinatorit Nacional të Strategjisë për Siguri Kibernetike, në vazhdimësi të vizitave në institucionet më të rëndësishme që kanë infrastrukturë kritike të informacionit, zhvilloi të enjten një vizitë në Bankën Qendrore të Kosovës, ku u prit nga guvernatori i BQK-së, Bedri Hamza.
Në komunikatën e dërguar për media nga Ministria e Punëve të Brendshme e Kosovës thuhet se Mustafa fillimisht njoftoi për nevojën e ngritjes së mekanizmave për mbrojtje nga sulmet kibernetike dhe në këtë drejtim, nevojën që në BQK të ngrihen mekanizmat e nevojshëm për parandalim të sulmeve kibernetike dhe ngritjen e vetëdijes rreth rrezikut që ekziston nga sulmet të tilla, sidomos në sektorin bankar, si një institucion i cili mban të dhënat financiare.
Po ashtu u ofrua përkrahja e plotë e MPB-së në mbështetje të BQK-së për ngritje të kapaciteteve në fushën e sigurisë kibernetike. Koordinatori Nacional i Strategjisë Kibernetike, paraqiti nevojën e një fushate vetëdijesuese të përbashkët ndërmjet institucioneve financiare dhe qeveritare me qëllim të njoftimit rreth rrezikut nga sulmet kibernetike.
Ndërsa guvernatori Hamza e njoftoi delegacionin për hapat që BQK-ja ka ndërmarrë për ngritjen e infrastrukturës së TIK në BQK dhe për veprimet që do të ndërmerren në të ardhmen. Ai bëri të ditur se rreziku i ndonjë sulmi eventual kibernetik ndaj institucioneve financiare është permanent.
"Guvernatori Bedri Hamza ofroi përkrahjen e plotë për stafin e tij profesional, në implementimin e të gjitha parakushteve që kërkohen për mbrojtje ndaj sulmeve kibernetike dhe njëherësh ofroi përkrahjen e tij personale në të gjitha iniciativat që ndërmerren për këtë fushë. Si konkludim i këtij takimi doli se rreziku nga sulmet kibernetike ndaj institucioneve financiare, siç janë bankat është permanent, andaj duhet të punohet në krijimin e mekanizmave parandalues dhe bashkëpunimin ndërinstitucional me qëllim të parandalimit të sulmeve kibernetike”, thuhet në fund të komunikatës për media të dërguar nga BQK-ja.
