Prokurori bleu armë 1000 euro
Zef Prenrecaj, drejtor në Zyrën e Prokurorit Disiplinor posedon armë të 1 mijë eurove, raporton “Zeri.info”.
Veç pasurisë së luajtshme e të paluajtshme, në formularët e pasurisë në Agjencinë Kundër Korrupsion, Prenrecaj ka deklaruar edhe armën llojin e të cilit nuk e ka specifikuar.
Banesa të cilën e ka deklaruar kap shifrën e 81 mijë e 987 eurove.
Ndërsa vetura që ai vozit, është e tipit “BMW” që vlen 8 mijë euro, raporton Zeri.Info.
Drejtori në Zyrën e Prokurorit Disiplinor (ZPD), është zhytur edhe në borxhe për pasurinë që zotëron.
70 mijë euro është shuma e detyrimeve financiare të tij, ndaj bankave për blerjen e dy banesave.
Ndërsa, veç tyre ai ka deklaruar se është në kredi 30 mijë euro për renovim dhe 2 mijë euro për një kredit kartel, visa.
Veç pasurisë së deklaruar Prenrecaj nuk qëndron keq as me të ardhurat e tij vjetore, raporton "Zeri.info".
Të hyrat e tij në vit kapin shumën e 12 mijë e 816 eurosh.
Pavarësisht kësaj, edhe familjarët e tij që jetojnë në vendet perëndimore i sigurojnë shumë të majme në pasurinë e tij.
Ai ka deklaruar 8 mijë e 100 euro të ardhura nga familjarët që i jetojnë jashtë vendit.
Por, Prenrecaj nuk i siguron këto të ardhura vetëm nga familjarët.
Në krijimin e pasurisë i ndihmojnë edhe familjarët e bashkëshortes, që ia sigurojnë 2 mijë euro në vit në formë huaje. /ZËRI/
