Stavileci: Kosova, e vendosur ta vazhdojë rrugën integruese
Pikërisht në vitin që nisi kriza financiare globale ne themeluam shtetin dhe u munduam ta rimëkëmbim ekonominë tonë pothuajse nga zeroja dhe anën tjetër në botë ndodhën disa ngjarje dhe po ndodhin, të cilat kanë ndikuar në rrjedhat e ekonomisë dhe të politikës, ka deklaruar ministri i Zhvillimit Ekonomik, Blerand Stavileci, në hapje të konferencës ndërkombëtare “Bota pas Brexit-it dhe Trumpit”.
Kjo konferencë që u mbajt në Kolegjin UBT në Prishtinë ka mbledhur personalitete të njohura vendore e ndërkombëtare, duke përfshirë politikanë, ekspertë dhe studiues të njohur të kësaj çështjeje, mes të cilëve Schari Zafarpour, Mitja Steinbacher nga Sllovenia, David Olster nga SHBA-ja, Federico Fernández nga Austria, Christopher Lingle nga Guatemala, rektori i UBT-së Edmond Hajrizi etj. Ministri Stavileci vlerësoi se kanë ndodhur ndryshime të shumta në botë të sistemeve, orientimeve e ideologjive të ndryshme ekonomike, të cilat ashtu siç është tematizuar kjo konferencë ndoshta më të mëdhatë janë Brexit-i dhe zgjedhja e presidentit Tramp, por edhe zhvillimet tjera në disa vende të Evropës.
“Të gjitha këto mund të ndikojnë ne atë se në një moment të caktuar krejt çfarë po bëjmë ne, shtetet e Ballkanit Perëndimor, Kosova, Shqipëria, Maqedonia, Mali i Zi, Bosnja dhe Serbia, po synojmë të shkojmë në drejtim të një agjende integruese evropiane në anën tjetër kemi shtete që kanë qenë ose janë pjesë e BE-së dhe kanë nisur të divergjojnë në koncepte dhe në ide”, tha ai.
Anëtarësim në BB dhe në FMN
Stavileci tha se Kosova beson se anëtarësimi në Bankën Botërore dhe në FMN si dy institucione të rëndësishme financiare dhe rruga e integrimit të rajonit në BE është orientim i mirë dhe në këtë linjë shkon edhe procesi i Berlinit. “Procesin e Berlinit që është agjendë e interkonektivitetit që janë gjashtë shtete të Ballkanit Perëndimor për t’u integruar sa më shpejt dhe sa më mirë në dy fusha që bëjnë lidhjen e shteteve të rajonit, pastaj të rajonit me shtete të BE-së, e që janë infrastruktura transportuese dhe ajo energjetike”, tha ministri. Sipas tij, Kosova merr pjesë në agjendën evropiane me katër projekte: Autostrada Prishtinë-Tiranë dhe ajo Prishtinë-Shkup, hekurudha dhe aeroporti. Dy nga këto projekte janë përfunduar, ndërsa autostrada për Shkup pritet të përfundojë në fund të vitit të ardhshëm, derisa projekti i hekurudhave i cili nis këtë vit me përkrahjen e BERZH-it dhe të Bankës Evropiane Investive dhe ne presim që këto të përfundojnë në vitin 2022, kur do të bëhet rishikimi i Konferencës së Berlinit.
Teknologjia, prioritet
Sa i takon sektorit të energjisë Stavileci tha se tashmë është lansuar strategjia afatgjate 10-vjeçare e energjisë, e cila është e përmbledhur në 5 objektiva si vizion strategjik i të ardhmes për ta përmirësuar gjendjen në këtë sektor. “Me hyrjen në funksion të termocentralit “Kosova e Re” dhe me arritjen e caqeve në kuadër të burimeve të ripërtëritshme, pra energjisë ujore, diellore të erës dhe biomasës parashohim që nga viti 2022 të mos ketë më probleme, të cilat i kemi pasur dhe të përfundojë periudha e problemeve për qytetarët dhe për bizneset”, tha ai.
Sipas ministrit Stavileci, një fushë tjetër tepër e rëndësishme, e cila mund ta adresojë më shpejt dhe më lehtë temën globale, siç është rritja ekonomike dhe punësimi, është teknologjia e informacionit dhe inovacionit. “Ministria që drejtoj, por edhe me partnerët e shumtë vendorë dhe ndërkombëtarë jemi munduar që agjendën e teknologjisë së informacionit ta sjellim në rrafshin e prioriteteve me të vërtetë parësore”, tha Stavileci, duke përmendur përgatitjet për fondin për teknologjinë informative dhe Qendrën e Inovacionit, si parakushte për zhvillimin e ekonomisë digjitale, respektivisht ekonomi të dijes. Ndryshe, kjo konferencë është organizuar nga Instituti Liberal për Hulumtim Politikash, në bashkëpunim me Austrian Economic Center dhe Universitetin për Biznes dhe Teknologji (UBT). Kjo është një seri konferencash ndërkombëtare e përvitshme, që në 11 javë udhëton në 45 qytete të ndryshme të Evropës.
