Bie mbështetja për Angela Merkel
Sondazhet e fundit në Gjermani tregojnë një rënie të mbështetjes për koalicionin e Angela Merkel. Aleati i vjetër konservator i kancelares Volfgan Shojble, tha se kolegia e tij e ka humbur prestigjin dhe zgjedhjet e fundit mund të sjellin ndryshime thelbësore në arenën politike të vendit.
Aleatët konservatorë të Angela Merkel mund të humbasin në zgjedhjet rajonale të së dielës në Bavari. CSU, partia krishtere e Bashkimit Social, e cila formon koalicionin e madh qeverisës bashkë me partinë e kancelares, parashikohet të humbasë 14% të mbështetësve të saj.
Sondazhet i vendosin të gjelbrit, me politikat e tyre pro emigrantëve dhe mbrojtjes së natyrës, 10% më lart, si forca e dytë më e madhe.
Edhe partia Alternativa për Gjermaninë, e cila mbron politikat kundër emigrantëve, mund të hyjë në parlament për herë të parë me 11% të votave.
Aleati i vjetër konservator i kancelares gjermane Angela Merkel, Volfgan Shojble, tha të premten se kolegia e tij e ka humbur prestigjin dhe zgjedhjet e fundit mund të sjellin ndryshime thelbësore në arenën politike të vendit.
Ish-ministri i financave, i cili tani drejton dhomën e ulët të parlamentit, i tha televizionit ES-VE-ER se Merkel mundet edhe të mos e fitojë postin e kreut të partisë nëse do të kandidojë në kongresin e dhjetorit.
Në mandatin e saj të katërt, Merkel e udhëheq vendin prej 13 vitesh, por mbështetja për bllokun e saj konservator është zbehur qëkur ajo vendosi të hapë dyert për 1 milionë emigrantë në vitin 2015.
