Britania hap hetime të reja ndaj televizionit rus RT

Rregullatori i medias në Britani Ofcom tha se ka hapur tri hetime të reja ndaj trasmetimeve të televizonit rus RT, në prill dhe në maj.

Këto iu shtohen shtatë hetimeve të nisura muajin e kaluar, për të parë nëse kanali i ka shkelur rregullat e paanshmërisë pas helmimit të një ish-agjenti rus në Britani, në muajin mars.

Ofcom tha në atë kohë se ka pasur "rritje të konsiderueshme" në numrin e transmetimeve të RT-së që kanë shkaktuar shqetësime që nga sulmi me agjent nervor ndaj Sergei Skripalit dhe vajzës së tij.

LEXO EDHE: Ministrja daneze: Ramazani praktikë e rrezikshme për gjithë ne, merrni pushim

"Transmetimet tona janë një burim i pafund i hetimeve të Ofcom-it. Pa marrë parasysh se çfarë zgjedhin, ata nuk mund të gjejnë asgjë, por nuk heqin dorë nga shpresa", tha në Twitter kryeredaktorja e RT-së, Margarita Simonyan.

Britania e fajëson qeverinë e presidentit rus, Vladimir Putin, për sulmin ndaj Skripalit në qytetin Sallsbëri të Anglisë.

Moska e mohon përfshirjen. REL