OKB: Mijëra gra, burra e fëmijë janë përdhunuar gjatë luftës në Siri

Ushtarë të ushtrisë siriane dhe milicë mbështetës të regjimit kanë ushtuar në mënyrë sistematike akte dhune dhe abuzime seksuale kundër civilëve, mizori që konsiderohen krime kundër njerëzimit, sipas një hetimi të OKB-së të publikuar sot.

Luftëtarët rebelë, të cilët luftojnë kundër regjimit sirian kanë kryer krime të ngjashme, por në një shkallë më të vogël se dhuna e ushtruar nga forcat qeveritare dhe milicët, aleatë të tyre, theksoi në raportin e tij Komisioni Ndërkombëtar i Hetimeve për Sirinë, i mandatuar nga Kombet e Bashkuara

Këto konkluzione, të prezantuara në Këshillin e të Drejtave të Njeriut në selinë europiane të OKB-s në Gjenevë, janë të bazuara në 454 intervista me të mbijetuar, dëshmitarë dhe stafin mjekësor. Qeveria siriane në fakt nuk i ka lejuar kurrë hetuesit e këtij Komisioni që të mbledhin informacione në zonat e prekuara nga lufta, përcjell Atsh.

Barrikadat e ngritura nën kontrollin e regjimit apo aleatëve të tij, si dhe qendrat e izolimit janë vendet kryesore të abuzimeve seksuale, bën të ditur raporti, që përshkruan disa skena tmerri.