Në Shkup nis ‘Samiti 100’
Mbi 150 liderë biznesi nga Europa Juglindore, katër kryeministra nga Ballkani Perëndimor, ministra dhe përfaqësues nga Bashkimi Europian po marrin pjesë në Samitin rajonal 100 që filloi sot në Shkup.
Lidhshmëria është tema kryesore e Samitit 100 në Shkup, gjegjësisht lidhshmëria në fusha të ndryshme dhe në nivele të ndryshme.
Një nga folësit kryesor do të jetë eurokomisarja për Transport, Violeta Bulc të cilës do t’i bashkohen liderë të njohur të biznesit, përfaqësues të kompanive të njohura nga rajoni, si Hidrija, ASA Group, Fondacioni Atlas, Grupi Atlantik, Gorenje, BMV, Podravka, Filip Moris, BBI, Uber, Bambi dhe të tjerët, si dhe përfaqësues nga institucionet financiare ndërkombëtare si Banka Europiane për Ripërtëritje dhe Zhvillim, Korporata Financiare Ndërkombëtare, Banka Europiane e Investimeve, Banka Botërore dhe shumë përfaqësues të tjerë të sektorit të biznesit.
Samitin zyrtarisht e hapën kryetari i Bordit të Samitit 100, Zhivko Mukaetov dhe Presidenti i Republikës së Maqedonisë, Gjorge Ivanov.
Sot do të mbahet edhe panel me temë “E-Koncepti për përshpejtimin e rritjes bazuar në lidhshmërinë” në të cilin do të marrë pjesë edhe zëvendëskryeministri i Angazhuar për Çështje Ekonomike, Koço Angjushev, shkruan tv21.tv.
Në ditën e parë të Samitit pritet paralajmërim për fillim të realizimit të projektit Edison për elektrizimin e autostradave në rajon.
Ky është një projekt rajonal që doli nga iniciativa 100 e Samitit, platforma e të cilit u nis në Slloveni në vitin 2015.
Sipas kryetarit të BD të Samitit 100 dhe drejtor i përgjithshëm i Alkaloidit, Zhivko Mukaetov, ngjarja është unikate dhe hap mundësi për lidhshmëri të vërtetë dhe shfrytëzim të potencialit të përbashkët të vendeve nga rajoni.
Jelena Radulloviq, drejtori programor i Samitit 100, konsideron se prej vitit në vit Samiti 100 po përparon dhe çdoherë i shtohet nga një dimension i ri nismës.
Panel me kryeministrat e vendeve të rajonit do të mbahet nesër.
Është konfirmuar pjesëmarrje e kryeministrave të Maqedonisë, Zoran Zaev, të Shqipërisë, Edi Rama dhe Malit të Zi, Dushko Markoviq dhe kryesuesit me Këshillin e ministrave të BeH , Denis Xvizdiq.
Kryetari i Qeverisë së Maqedonisë, Zoran Zaev është ftuar të marrë pjesë me fjalimin e tij në panel-debatin plenar të kryeministrave nën titullin “Marrëveshja e re për kohën e re, apo, nëse rajoni është i përgatitur për garë në skenën globale”, në të cilën do të diskutohen edhe temat e energjisë, për ekonomitë e bazuara në njohuri, për marka, ekonominë digjitale dhe për strategjitë për lidhjen e rajonit dhe për iniciativat e përbashkëta në fushën e turizmit.
Ndryshe kryeministri i Kosovës, Ramush Haradinaj nuk po merr pjesë në këtë Samit për shkak të agjendës së përcaktuar në Kosovë. /21Media
