Policia britanike po heton një 'rrjet' terrorist në lidhje me sulmin në Manchester

Policia në Britani thotë se është duke hetuar një “rrjet”, pas sulmit në një koncert në Mançester, ku u vranë 22 persona.

“Mendoj se është e qartë se ky është rrjet të cilën ne jemi duke e hetuar”, tha Ian Hopkins, shef i policisë në Mançester, duke shtuar se policia është duke bërë “kërkime të gjera”, në qytetin e Mançesterit.

Ministrja e Brendshme britanike, Amber Rudd, më herët ka deklaruar se sulmi i 22 majit ishte “shumë më i sofistikuar se sulmet që kemi parë në të kaluarën, dhe duket se me gjasë sulmuesi vetëvrasës nuk ka vepruar i vetëm”.

Rudd i ka thënë radios BBC se duket se sulmuesi, i identifikuar si 22-vjeçari Salman Abedi, i lindur në Britani, së fundmi kishte udhëtuar në Libi. Abedi ishte me prejardhje nga Libia.

“Ky informacion besoj se është konfirmuar. Kur ky operacion të ketë përfunduar, ne duam të shikojnë se si u radikalizua ai”, ka thënë ajo.

Pesë persona janë arrestuar në lidhje me sulmin, përfshirë edhe një person që raportohet se është vëllai i Abedit.

Grupi militant Shteti Islamik ka marrë përgjegjësinë për këtë sulm./rel/