Historia e pabesueshme e presidentit të ardhshëm francez: U martua me mësuesen e tij të gjimnazit, 25 vjet më të madhe

Bota April 24, 2017 - 13:21

 

Ai është ylli në ngjitje në arenën politike europiane – një lider i ri, karizmatik, që hoqi dorë nga drejtimi i Partisë Socialiste franceze, për të krijuar lëvizjen e tij politike dhe tani në zgjedhjet presidenciale të Francës, kryeson përballë Le Pen dhe me shumë gjasë, do të jetë presidenti i ardhshëm i francezëve.

Por burri që shumë shpejt mund të vendoset në krye të shtetit francez, njihet edhe me një tjetër emër: ‘chouchou’, i përkthyer ndryshe ‘kafsha shtëpiake e mësueses’.

Dhe ka një arsye për këtë.

39-vjeçari Emmanuel Marcon është i pashëm dhe inteligjent dhe veç titujve politikë, bashkë me bashkëshorten e tij Brigitte Trogneux, kryesojnë titujt e revistave të modës.

Brigitte është 25 vite më e madhe se Macron, madje ka qenë dhe mësuesja e tij e letërsisë në gjimnaz.

Kjo shpjegon dhe nofkën.

Të dy janë njohur kur Macron ishte 15 vjeç dhe studionte në shkollën Jésuites de la Providence në Amiens, në veri të Francës.

Zonja Trogneux, e njohur në atë kohë si Brigitte Auzière, jepte leksione letërsie dhe drejtonte klubin teatral të shkollës.

Ajo ishte 40 vjeç, e martuar dhe kishte tre fëmijë, madje një prej vajzave të saj ishte në të njëjtën moshë me Macron.

Ky i fundit shumë shpejt u bë i preferuari i saj.

“Në klasë ajo gjithmonë i referohej atij si shembull,” rikujton një shok klase i Macron.

“Ai shkruante poezi gjatë gjithë kohës dhe ajo i lexonte me zë të lartë.”

Romanca lulëzoi një vit më vonë, kur të dy nisën të punojnë bashkë për një dramë në shkollë.

“Të shkruarit na bashkoi më shumë,” tregoi më vonë Brigitte.

“Ne shkruanim dhe pak nga pak unë mrekullohesha nga inteligjenca e tij. Nuk ishte si gjithë të tjerët.

Askush nuk do ta dijë në ç’moment historia jonë u kthye në një histori dashurie.

Ajo na takon neve. Është sekreti ynë.”

Prindërit e Macron sidoqoftë nuk ishin aspak të emocionuar për këtë lidhje.

Kur tregoi në shtëpi që ushqente ndjenja për dikë nga familja Auzière, të gjithë menduan se bëhej fjalë për vajzën e Brigitte.

Kur mësuan të vërtetën e dërguan me studime në Paris.

[Historia e pabesueshme e presidentit të ardhshëm francez: U martua me mësuesen e tij të gjimnazit, 25 vjet më të madhe]

Megjithatë Macron ishte i vendosur.

“Nuk do të më heqësh qafe,” i tha mësueses së tij para se të largohej. “Cfarë do të bësh, ne do martohemi.”

Dhe kishte të drejtë. Të dy flisnin çdo ditë në telefon derisa Macron mbushi 18 vjeç.

Atëherë Brigitte e la të shoqin dhe gjeti një vend pune në Paris për të qenë pranë Macron-it.

Që prej asaj kohe kanë qenë bashkë dhe në 2007-ën u martuan.

Në dasmën e tyre Macron falënderoi fëmijët e saj që e pranuan lidhjen, duke shtuar se ata ‘nuk ishin një çift normal, por një çift që ekzistonte’.

Me një mësuese si Brigitte në krah, ylli politik i Macron është rritur në mënyrë spektakolare: ai krijoi pasurinë e tij duke investuar në bankë, iu bashkua partisë socialiste, në 2014-ën u emërua ministër i Ekonomisë, detyrë nga e cila hoqi dorë një vit më parë për të themeluar ‘En Marche’, një revolucion demokratik që drejtohej nga të rinjtë.

Me rritjen e profilit profesional, edhe jeta e tij private përbënte interes për francezët.

Tani në moshën 64-vjeçare, Brigitte është kthyer në një ikonë stili.

Shpesh gjendet në radhën e parë në shfaqjet më prestigjioze të modës dhe me flokët bjonde, lëkurën e grunjtë, pantallonat e lëkurës dhe fustanet e shkurtra, duket më shumë si modele sesa si një mësuese letërsie.

Gazeta franceze ‘L’Express’ e ka përshkruar stilin e saj si ‘rock’n’roll’, që nuk i vendos kurrë vetes kufij por guxon shumë.

Por Brigitte ka patur dhe vazhdon të ketë një ndikim shumë të madh tek karriera e Macron.

Ajo e ndihmonte të përgatiste fjalime dhe bëhej pjesë e mbledhjeve të rëndësishme krah të shoqit.

Madje të gjithë kohën e kalon pranë tij, lexon dhe dëgjon gjithçka që ka të bëjë me të, këshillohen me njëri-tjetrin dhe persona pranë të dyve tregojnë si Marcon sillet si ‘një fëmijë i vogël’ para saj.

Ky i fundit ka këmbëngulur që nëse zgjidhet president, gruaja e tij do të ketë një rol kyç në drejtimin e vendit.

Megjithatë jo të gjithë i kanë kaq përzemër, edhe pse diferenca e tyre në moshë është e njëjtë me atë të Donald dhe Melania Trump.

Në shkurt martesa e tyre është quajtur një mashtrim, sipas tyre për të mbuluar faktin që Macron kishte një lidhje homoseksuale me Mathieu Gallet, 40-vjeçarin në krye të Radio France.

Marcon u detyrua të japë një deklaratë publike në televizion ku mohoi gjithçka.

“Unë jam ky që jam. Nuk kam patur kurrë asgjë për të fshehur. Dëgjoj që njerëzit thonë se kam një jetë sekrete.

Nuk është e këndshme për Brigitte t’i dëgjojë këto. Sepse unë i ndaj të gjitha ditët dhe netët e mia me të,” u shpreh Macron./pamfleti/