Puna që e pret EULEX-in në mandatin e ri
Prokurorët e EULEX-it janë të përfshirë në gjithsej 108 raste. Nga to, 40 kanë të bëjnë me krime të luftës, 40 për krim të organizuar, 15 për korrupsion, 7 kundër terrorizmit dhe 6 raste për krime financiare.
Të gjitha këto, pa llogaritur ndonjë rast të ri që mund ta marr në të ardhmen, ky mision duhet t’i përfundojë deri në qershor 2018.
Edhe pse ka filluar procesi i bartjes së rasteve, EULEX për këto tetë vjet sa është në Kosovë nuk ua ka dhënë të gjitha kompetencat vendorëve.
Avokati Arianit Koci vlerëson se zvarritja e bartës së kompetencave ka ndodhur për shkak të hetimeve për korrupsion në vet këtë mision. Ai thotë se këto raste mund të përfundohen për dy vjet.
Prej fillimit të misionit të EULEX-it, Prokuroria Speciale e Kosovës ka qenë e përfshirë në 1.350 raste.
Prej tyre edhe 854 raste vazhdojnë të jenë të pazgjidhura. Për këtë çështje Betim Musliu, nga Instituti i Kosovës për Drejtësi thotë se prokurorët e EULEX duhet të marrin përgjegjësi.
Por nëse EULEX e sheh të nevojshme të merret me raste të reja duhet të marrë leje të veçantë, pasi kjo ishte kërkesë e institucioneve të Kosovës, e që ka marrë bekimin e BE-së.
Kjo po ndodh sipas IKD-së për të kontrolluar sistemin e drejtësisë nga ana e njerëzve të politikës.
