Trajkoviq ‘godet’ ashpër Vuçiqin: Politika e tij është vazhdimësi e asaj të Millosheviqit
Ish-deputetja serbe në Kuvendin e Kosovës, Rada Trajkoviq e ka goditur ashpër presidenin e Serbisë, Aleksander Vuçiq, për fjalimin e këtij të fundit të mbajtur në Kosovë, ku ndër të tjera u përmend edhe ish-diktatori jugosllav, Sllobodan Milosheviq.
Ndër të tjera, Trajkoviq tha se deklarata e Vuçiq nuk mund të jetë e rastësishme, ngase sipas saj edhe vetë politika e presidentin serb është vazhdimësi e asaj të Millosheviqit, transmeton lajmi.net.
“Politika e ndarjes etnike është një katastrofë. Më duhet ta them haptazi, nuk qe një rastësi që Vuçiq e përmendi edhe Millosheviqin në fjalimin e tij, sepse strategjia e tij e shpalosur në Kosovë është vazhdimësi e politikës së vetë Millosheviqit”, ka thënë Trajkoviq.
Sipas saj, pas shpalosjes së planit të Vuçiqit në Kosovë, Serbët këtu tani kanë më pak besim, ngase siç thotë ajo situata është e njëjtë me shqiptarët e Luginës.
“Tani kur serbët e panë atë tek vije me një strategji të re, kanë më pak besim në atë. Situata është e njëjtë me shqiptarët e Jugut, të cilët nuk dijnë nëse do të hyjnë në proces të krijimit të këshilleve apo jo”, ka thënë Trajkoviq.
Kujtojmë se aktualisht Trajkoviq është kryetare e Lëvizjes Europiane të Serbëve nga Kosova.